Imaaliornikkut Naalakkersuisoqatigiilertoqassaaq
- Inatsisartuni partiit annersaata, Siumup siulittaasuata, Kim Kielsenip partiit allat siulittaasui tulleriiaarlugit ullumi oqaloqatigai. Partiit allat tassani qanoq inissisimanersut tusarniarpaa. Tassa sunik kissaateqarpat, suut pingaarnertut suliassaaatipaat Siumullu Naalakkersuisoqatigilissagunikku arlannik allanngortitassaanngitsunik piumasaqarpaat, Jens Thorin nassuiaavoq.
Kim Kielsen taamaalioreeruni tunuliaquttani ornissavai - tassa Inatsisartunut ilaasortanngortut Siumumeersut, immaqalu aamma partiip siulersuisuuneri. Taakkua tipisiuinerminit paasisaminit nalunaarfigissavai. Amma partiit siuttui, Kimip oqaloqatigisimasai, taamaaliussapput.
Taava taamaalippat, kikkut oqaloqatigenerorusunnerlugit Kim Kielsenimut paasinarsisimanerulissajunnarsivoq.
Qaqugu Naalakkersuisoqalernissaa naatsorsuutigisinnaavarput?
Tamanna nalunaqaaq. Ullualunni suli oqaloqatiginnittaqattaassajunnarsivoq. Taava tamaalioreerpaat, partiit piviusorsiortumik isumaqatigiinnialissapput. Tassani partiit Naalakkersuisut ukiuni tulliuttuni sulinerminni pilersaarutissaannik isumaqatigiissuteqarniassapput. Sulinermi Pilersaarut - tassa Naalakkersuisoqatigiinnerrmi isumaqatigiissut - partiit sunik sulissuteqarnissaannik sunillu angusaqarusunnerannik imaqasaaq.
Naalakkersuisoqatigiinnermut isumaqatigiissut sunik imaqassava?
Tamanna oqaaseqarfigissallugu siusippallaarpoq. Kikkut naalakkersuisoqatigiiilernissaat apeqqutaalluinnarpoq.
Kisianni aalisarneq initussagunaqaaq, aamma soorluuna tunngaviusumik inatsimmut ataatsimiititaliaq eqqaaneqassasoq.
