Qinersinerit ima kisinneqassapput
- Aallartiffik tassaavoq qinersivik - taakkua 72-iupput - minnerpaamiit Qeqetaniit 18-iinnarnik qinersisartoqartumit Nuummut 12.000-inik amerlanernik qinersisartoqartumut
Klaus Georg Hansen nassuiaavoq nangillunilu:
- Naatsorsuutigaara qinersivinni ataasiakkaani qinersinermi aqutsisut nalunaaqutaq arfineq pingasut minutsimik ataatsimik qaangerpagu kisitsineq aallarteqqussagaa. Tassalu taasinermut karsi ammassavaat taavalu nerrivimmut imaluunniit nerrivinnut kuissajunnarsivaat - immikkoortiterinerlu allartissaaq.
Qinersinerit qineqqusaartukkaartumik Qinersivinni immikkoortiterneqassapput, inernerusullu qularnarunnaarpata, taakkua kommunip qinersinermik siulersuisunut nassiunneqassapput:
- Tassani inernerusut nassiussarsiatik qarasaasiamut, qinersineq.gl-imut iserluni takusinnaasamut, allattussavaat.
Qinersinermik siulersuisut inernerusut allattoreerunikkit, taakkua Qinersinermut Ataatsimiititaliamut allattoqarfianut nassiutissavaat, tassanilu eqqortuunersut aappassaanik misissorneqassapput.
- Misissoreerutsigit, pappialamilu allassimasut qarasaasiamut ilumut aamma allanneqarsimasut, kommunilu isumaqatigiissutigereerutsigu, taava akuersissutigissavagut, Klaus Georg Hansen oqarpoq.
AAMMA ATUARUK Nunarsuatsinni tusagassiorfiit kalaallit qinersineranni malinnaasut
Taanna oqaluttuarpoq, qinersinerup inernera sapaatit akunnerat qaangiuppat aatsaat inaarutaasumik akuersissutigineqarsinnaavoq, taamaalippat maalaaruteqarsinnaaneq qaangiutissammat.
Qinersinerup inernivia qaqugu takuneqarsinnaalissanersoq siulittuutigiumanngilaa, nerliupporli pingasunngornermut unnuap qeqqata tamatumaluunniit kinguninnguaasinnaassasoq.
AAMMA ATUARUK Meeqqat Qaqortumi, Sisimiuni Nuummilu qinersinerup ulluani ingerlaaqatigiissinneqarput
