Vittus: Qineqqusaarneq pikkunarsimavoq
Qaammatip ataatsip ingerlanerani partii atsiornernernik katersisariaqarsimavoq, taamaalineranilu qinersinissamut piareersartoqarpoq, qinigassanngortitussanillu katersisoqarpoq.
- Qineqqusaarnerup kingorna maanna qasukkarsimaarpunga, Vittus Qujaukisoq oqarpoq.
Partii Nunatta Qitorani akunnittarfiup Hotel Hans Egedep qullersaani partiimi ilaasortat qinigassanngortittullu peqatigalugit katerisimaarput, qinersinerlu malinnaaffigalugu, nipilersortartoq inatsisartunullu partii sinnerlugu qinigassanngortittoq Pavia Geisler nipilersortaralugu.
Vittus Qujaukitsoq aatsaat inatsisartunut qinigasanngortinngilaq. Qineqqusaarnerli una immikkut illuinnartuuvoq, ilungersunarnerullunilu.
Partii nutaaq akisussaaffigivaa, partiip pilersaarutai suliarineqartussaapput, aamma qinigassanngortittussat qulakkeerneqartussaapput, qineqqusaarnerlu sukkanerpaamik suliarineqarluni.
- Suna tamaat naqqaniit nassaariniarneqarpoq, partiimi atorfilittaqarata allaffeqarata, piffissamillu sivikitsumik periarfissaqarluta qinersinissamut pakasagaavugut, Vittus Qujaukitsoq oqarpoq.
Marlunngornermi unnukkut qinersineq nalliuttorsiutigalugu inuit 25-it missaanniittut siulittaasoq peqatigalugu, akunnittarfik Hotel Hans Egede unnuap qeqqanut qimappaat, qinersinerup inerneri suli naammassinngitsut.
Unnuaq marlunut qinersinermi kisitsisit kingulliit takkupput, tassanilu takuneqarsinnaavoq, partii Nunatta Qitornai ataatsimik inatsisartuni ilaasortaatitaqalernissaat ilimanarmat tassalu partiip siulittaasua Vittus Qujaukitsoq Aleqa Hammondimit amerlanerusunik taaguuneqarmat.
