Ken Jensen iliuuseqaqqusisoq: Ernisarfiit amerlanerulerlik

Ernisarfiit nunaniillu allanit sulisussat amerlanerusut.

Taakku uteqqianeqartarput nunatsinnni peqqinnissaqarfik eqqartorneqartillugu. Ken Jensen taamannak oqariartuuteqartunut ilannguppoq.

Peqqissaasut Kattuffianni siulittaasuuvoq, maanili nammineq inuttut nunatsinni peqqinnissaqarfimmut ukiuni 23-ni attuumassuteqarsimasutut oqaaseqarpoq. 

Nunatsinni peqqinnissaqarfik pillugu takorluukkani tusagassiorfinnut nalunaarutikkut nassiuppai, tassani ilaatigut nunanit allanit atorfinitsitsineq qanoq eqqarsaatigeqqinneqarsinnaanera, najukkanilu ernisarfeqarnissap taamak pingaaruteqartiginera oqariartuutigalugit.

Taamannak oqariartuuteqarpoq peqqinnissaq pillugu ataatsimiititaliarsuup peqqinnissaqarfimmik kivitsinissamut pitsanngorsaatissanut innersuussutiminik ukioq manna tunniussaqarsimalernerata kingunerisaanik. 

Arnat najukkaminni ernisinnaassapput

Kalaallit Nunaanni qanoq amerlatigisunik ernisarfeqarnissaanik oqallinneq qaqeqqinneqarpoq, aammaloortumik. Peqqinnissamut ataatsimiititaliaq maajimi siunnersuuteqarpoq Kalaallit Nunaanni marluinnarnik ernisarfeqassasoq.

Immikkut ilisimasallit, anaanat ernisussiortullu peqatigiiffiat isumassarsiaq tamanna isornartorsiorlutik apeqquserpaat.

Ken Jensenilu isumaqarpoq tamanna isumassarsiatsialaanngitsoq.

Isumaqarpormi nunatsinni sumiiffinni amerlanerusuni ernisoqarsinnaasariaqartoq.

- Eqqaamassavarput erninerit amerlanersaat pisariusuunngimmata. Taakku najukkami isumagineqartariaqarput. (...) Najukkamili napparsimmavimmi pinartumik pisoqariasaassappat qanoq iliornissaq pillugu ersarissumik periuseqassaaq, tusagassiorfinnut nalunaarummi oqarpoq.

Oqaatigaali peqqissaasoq, nakorsaq ernisussiortorluunniit erninermi ikiuussinnaasoq, anaananngortussallu ilisimassagaa najukkami erninermi nalorninartoqarsinnaasoq.

Nunatsinni ilinniartitaaneq ukkatarineqassaaq

Isumassarsiaq alla peqqinnissaqarfimmi assassaaleqinermut atatillugu qaqinneqaqattaartartoq tassaavoq naalagaaffeqatigiinnerup avataanit atorfinitsitsisoqarsinnaassasoq.

Danmarkip Kalaallit Nunaatalu akornanni isumaqatigiissummi septembarimi atsiorneqartumi allassimavoq, peqqinnissaqarfimmi sulianik assigiinngitsunik suliaqartut nunanit allanit inuttalersorneqarsinnaanissaat ajornannginnerulissasoq.

Anna Wangenheimip (D) siunnersuutigaa nakorsanik peqqissaasunillu assersuutigalugu Cubameersunik atorfinitsitsisoqarsinnaasoq.

Ken Jensenili isumaqarpoq tamanna imaaliinnarlugu aaqqiissutigineqarsinnaanngitsoq.

- Isumaqartoqarsinnaavoq peqqinnissamut sulisunik sulinermi maani atugassarititaasunik akuersaarnerusunik nunanit allanit sulisussarsiniartoqaannarsinnaasoq – Cuba ilaatigut taaneqarpoq. Siunissamili qaninnerusumi tamanna aaqqiissutaanngilaq, oqarpoq.

Taarsiullugu nunatsinni peqqissaasut ilinniartinneqarnerat ukkatarineqarnerusariaqartoq Ken Jensen isumaqarpoq – minnerpaamik ukiumut 20.