Kannguttaatsuliorneq pillugu nunatsinni eqqartuussivinni suliat annersaat suliarineqalersoq
Killiliisamik taallugu nunatsinni angusaqarniarnerup marlunngornermi januaarip tallimaani immikkoortua nutaaq allanneqassaaq.
Siumup Partii Naleqqamilu allattaanerusimasoq, Mikael Petersen, Eqqartuussisoqarfik Sermersuumi suliassami oqaluttuarisaanermi eqqaamasassami ulloq taanna sassassaaq.
AAMMA ATUARUK Partiimi allattaasimasoq kannguttaalliorfiginnittutut eqqartuussivimmi sassaassasoq
Taanna pisuni sisamani arnamut arnanulluunniit kannguttaatsuliorsimaneragaalluni unnerluunneqarpoq.
Tamakkua Siumup Nuummi allaffiani 2013-imiit 2018-imut pisimaneragaapput. Unnerluussut, KNR-ip qinnuteqarnikkut pissarsiarisimasaa, naapertorlugu Mikael Petersenip arnaq arnalluunniit nuluisigut attuualaartarsimavai pattalaartarsimallugilluunniit.
Unnerluussisussaatitaasut partiimi allartitut misilittagaqarluartup ulluni 60-ini pineqaatissinneqarsimasunut inissiisarfimmiinnissaa piumasaraat. Pineqartup kinguaassiuutitigut kannguttaatsuliorsimaneragaaneq ilisarinngilaa, naak killissamik qaangiisimaguni utoqqatsereeraluarluni.
Suliaq suliani nunatsinni assigusuni sammineqarnerpaavoq arnallu pisinnaatitaafii pillugit 2020-mi kissaammernertalimmik oqallinersuarmut aallartitseqataavoq.
Killiliisa
Pisut tamarmik arnat assigiinngitsut qulit, Folketingimut ilaasortaq Siumumeersoq Aki-Matilda Høegh-Dam taakkununnga akuulluni, assamminnik allagaannik aallartipput. Allakkat puui arnat Mikael Petersenip imminnut imminiilliorsimaneraanerannik imaqarput. Allakkat februaarip 27-ani 2020 tamanut saqqummiunneqarput.
Sivisuumik ersineq pigalugu oqaaseqarneq ajulersimavunga. Oqarfigitittaramami inuttaa pissaaneqangaarmat ataqqineqangaarmallu oqaaseqaruma upperineqarnavianngitsunga aamma inuunera sequtserumaaraa, Aki-Matilda Høegh-Dam Facebookikkut tamatuma kingunitsianngua allappoq.
AAMMA ATUARUK Nikanarsagaallutik tiingaffigineqartut: Nipangersimaannarasi kisimiinngilasi
Mikael Petersenip innimiilliorsimaneragaanini ilisarinngilaa, Siumulli siulersuisuunerisa suliffianiit soraarsissimagaagooq tusarsaalermat partiip allattaatut atorfimminit nammineq tunuarluni.
Taamaalillunilu Metoomik taallugu angusaqarniarneq, angutit pissaanillit arnanik uteqqittumik amerlasuuunullu ingammik USA-mi innimiilliortarnerannik qulaarinnittoq, nunatsinnut apuuppoq. Maani tamanna killiliisa taaguuserneqarpoq.
Partii Naleraq atorfinittoq
Tamatuma kingorna oqallittoqaqaaq. KNR-ip ilaatigut Naaja Nathanielsen arnallut arnallu, aterminnik saqummiussinngitsut, Inatsisartuni angutit arnanut asissuinerannik oqaluttuartut oqaloqatigai. Innimiilliortarneq inuiaqatigiinni iliuuseqarani nipaatsumillu akuersaarneqartoq, Paninnguaq Heilmann, allakkanik nassiussisunut ilaasoq, KNR-imut oqarpoq.
Siumut taamani siulittaasua, Kim Kielsen, tusagassiutinit politikerinillu allanit kimigiiserfigineqareerluni, innimiilliortarneq akuerineqarsinnaanngilluinnartoq erseqqissarlugu allakkatigut nalunaarpoq.
Partii naleqqap Mikael Petersen allatsimisut atorfinitsissimagaa apriilip aallaqqaataani ilisimaneqalerpoq. Taamaalimmat Kuno Fencker aamma partiip inuusuttunut immikkoortortaata siulittaasua, Paarnannguaq Tobiassen, partiimi ilaasortaajunnaarput. Mikael Petersenili allattaajunnaareertoq, Partii Naleraq ilisimatitsivoq.
Pineqartoq politiinut maajimi nalunaarutigineqarpoq.
AAMMA ATUARUK Mikael Petersen: Kinguaassiutitigut innimiilliorneraanerit ilisarisinnaanngilakka
Mikael Petersen Partii Naleqqami atorfinitsiaannarluni tusagasskiutinut nalunaaruteqarpoq. Siumumi nangaanani imminut oqaluuteriaaseqarnikuusoq, tamannalu allattaanermini peqataaffigisarsimallugu tassani allappoq.
-Kinguaassiutitigulli innimiilliornerit pineqarneranni taakku arlaatigut ilisarisinnaanngilakka. Eqqartuussissuserisullu tassunga atatillugu suliassanngortitassaqanngissoraat, Mikael Petersen tusagassiuutinut nalunaarummi allappoq.
Eqqartuussissuserisut isumaqatigineqarnersut januaarip tallimaani paasinarsissaaq.
