Partiimi allattaasimasoq kannguttaalliorfiginnittutut eqqartuussivimmi sassaassasoq
Nutartigaq: Mikael Petersenip Partii Naleqqami allattaanertut atorfeqarunnaarsimasoq maanna erseqqissarneqarpoq.
Kissaatiginngisamik attuinerit kinguaassiutinullu tunngasunik oqalunneq.
Siumumut allattaasimasup Mikael Petersenip eqqartuussivimmut sassarnissaanut tamakkua qitiupput.
Taanna pisuni katillugit sisamani arnamut arnanulluunniit qassiiusunut kannguttaalliorfiginninneragaalluni unnerluutigineqarpoq. Tamanna unnerluussummi KNR-ip takunnissinnaaffigisaani allassimavoq.
Matumani Mikael Petersenip 2013-imit 2018-imut arnap arnalluunniit qassiiusut nuluisigut attualaarisimaneragaasoq pattalaarisimaneragaasorluunniit allassimavoq.
AAMMA ATUARUK Innimiilliorneragaasoq: Mikael Petersen politiinut suliassanngortinneqartoq
Arnat iviangii kuglepenimik aamma kivissimagai qasseriarlunilu arnat kannguttaatsuliornertut misigisaanik oqaaseqarsimasoq allassimavoq.
Assersuutigalu arnap ataatsip qassiiusulluunniit iviangii sigguilu oqaaseqarfigisimagai aamma arnamut ataatsimut ”Aammalu taannaaraq (aqqa isertuussaq, aaqq.) tunuaneerlugu qanormita ippa", unnerluussummi allassimavoq.
Pisut sisamat assigiissutigaat tamarmik Siumup Nuummi allaffeqarfiini pisimasuuneragaapput.
Mikael Petersen pinngitsuunerartoq
Pisut qassiiusut Siumumi assigiinngitsunik atuuffeqarsimasup Mikael Petersenip Siumumut allattaanerani pisimaneragaapput.
Arnat qulit Siumumut atttumassuteqartut Mikael Petersen innimiilliorsimanerarlugu februaarimi unnerluutigaat. Arnat qassiiusut – Aki-Matilda Høegh-Dam taakkununnga ilaalluni – kingornatigut tamanut saqqummerput.
AAMMA ATUARUK Mikael Petersen: Kinguaassiutitigut innimiilliorneraanerit ilisarisinnaanngilakka
Siumumi atorfeqarsimasoq nammineerluni pinngitsuunerarpoq. Taassuma pisimasut unnerluussummi allaatigineqartut ilisarisinnaanagit oqarpoq.
- Eqqartuussivimmi suliarineqalernera nuannaarutigaara, suliamut atatillugu aalajangiisoqassammat. Allamik oqaasissaqanngilanga, taanna KNR-imut oqarpoq.
Arnat aqqi unnerluussummi ersigunnaarsinneqarsimapput. Taamaammallu arnat qassit pineqarnersut paasineqarsinnaanani. Mikael Petersenip KNR-imit aperineqarami unnerluutigineqarnini itinerusumik oqaaseqarfigerusunngilaa.
Siumup siulersuisuunerisa partiip allatsigisimasaata sulisussaajunnaartinneqarnissaa februaarimi aalajangerpaat, taannali tamatuma kingorna nammineerluni soraarpoq.
Mikael Petersen qaammatit marluk qaangiuttut atorfiup assingani partiimili allami, tassa Partii Naleqqami, atorfinissimavoq. Partii Naleqqamili maanna atorfeqarunnaareerpoq.
Suliaq eqqartuussivimmi aappaagu januaarip ulluisa tallimaanni suliarineqassaaq.