Kangerlussuaq pillugu isumaqatigiinnginneq
Naalakkersuisut Nunatsinni mittarfiit pillugit pilersaarutaat, Inatsisartut ukiakkut ataatsimiinnerat naggaserlugu amerlanerussuteqarluartut ippassaq akuersissutigaat.
Mittarfiillu pillugit oqallinnermi, partiit tamanna pillugu oqaaseqartartuisa, Kangerlussuup siunissaa oqallisigilluarpaat.
Ilulissani Nuummilu mittarfiit atlantikoq qulaallugu timmisartunik miffigineqartalerpata, Kangerlussuup sumut atorneqarsinnaanera pillugu, Inatsisartut sanaartornermut ataatsimiititaliaat Kangerlussuarmut novembarip 16-anni paasisassarsiorput.
Aamma atuaruk Mittarfiit pillugit pilersaarut akuersissutigineqarpoq
Tamannali sioqqullugu Kangerlussuup sumut atorneqarsinnaanera eqqartorneqarmat, mittarfiup aaqqissuunneqarnissaanut aningaasartuutit assigiinngitsut saqqummiunneqartarput, ilaatigut 150 millioninik akeqassagatinneqartoq ilaatigullu allaat 2 milliarder koruuninik akeqassagatinneqartarluni.
Kisitsisilli taakku annertunaarneqarsimasut, Inuit Ataqatigiit oqaaseqartuata, Kalistat Lundip oqaatigaa.
- Isumaqarpunga naaliliisimaneq qaffasigaanaarujussuusoq. Taamaattumik oqaluttarfimmi oqarpunga, taama qaffasitsigisumik naliliisimanerait unissaanermik taamaallaat tunngaveqarsimasinnaasut, Kalistat Lund oqarpoq imalu nangilluni oqarluni.
- Kangerlussuup mittarfiata aaqqissuuteqqinnissaanut aningaasat 500 millioner koruunit missaanniittut atorneqarsinnaassasut unga ilimagineruara, Kalistat Lund oqarpoq.
Aamma atuaruk Mittarfiit tallilerneqarnissaat IA-p akerleraa
Tassa Kangerlussuup mittarfiata ilaa 2450 meterisut takissulik iluarsartuunneqarluni atorneqalernissaa 500 millionit angullugit akeqarsinnaasoq Kalistat Lund oqarpoq.
Aamma atuaruk Mittarfiit marluk sanaartornermi ataatsimiititaliap salliutippaat
Kangerlussuarmi mittarfik siunissami arlaannut atorneqaannassappat, taannalu iluarsartuunneqarluni aningaasat 1,2 milliard koruunit atorneqartariaqartut, Siumut sinnerlugu oqaaseqartup, Jens-Erik Kirkegaardip oqaluttarfimmiit oqaatigaa.
Sanaartornermut ataatsimiititaliamit innersuussutigineqarnerata kingorna, Kangerlussuup sumut atorneqarsinnaanera misissoqqinneqassaaq. Tamassumalu inerneri, Ilulissat Nuullu mittarfiisa tallineqarnissaannut atatillugu pilersaarutit Inatsisartut aappaagu ukiakkut ataatsimiinneranni oqallisigineqalerpat ilanngunneqassallutik.
Naalakkersusisut mittarfiit pillugit pilersaarutaannut Inatsisartuni ilaasortaq, Per Rosing Petersen, Partii Naleraq kisiartaalluni pilersaarummut isumaqataanani taasivoq.
