Mittarfiit tallilerneqarnissaat IA-p akerleraa

Inuit Ataqatigiit mittarfiit pillugit siunnersuutit ataatsimoortut akerleraat.

Nuummi Ilulissanilu mittarfissualiornissaq Naalakkersuisut siunnersuutaat Inuit Ataqatigiit Partii Naleqqallu akerleraat.

- Maannakkut inuiaqatigiit sanngiinnerpaat akiliisussanngorlugit millionærit angalanissaat aaqqissuunniarneqarpoq. Mittarferujussuit assigiinngitsullu sananeqarnerisigut, Inuit Ataqatigiinni Inatsisartuni ilaasortaq Kalistat Lund Inatsisartut ippassaq oqallinneranni oqarpoq.

Naalakkersuisut siunnersuutaat Inuit Ataqatigiit isumaqatiginngilaat. Qaqortumi, Tasiilami Ittoqqortoormiinilu mittarfiliornialikkersaarneq sukumiisumik misissuiffingeqqaarusuppaat.

Aamma atuaruk Mittarfissat pillugit siunnersuutit ataatsimiititaliamut innersuunneqarput

Nuummi Ilulissanilu mittarfiit tallineqarnissaat pisariaqanngitsoq Inuit Ataqatigiit aamma isumaqarput.

-Tunngaviatigut isumaqarpunga ullumikkut avataaninngaanniit isaaviusut tassa Kangerlussuaq taavalu ukiup ilaatigut Narsarsuaq ilanngullugu. Taakkua tunngaviusumut tassaasariaqartut isaaviusussat.

Mittarfiit pillugit siunnersuutit ataatsimoortumi Nuummi Ilulissanilu mittarfiit tallineqarnissaat salliutinneqarpoq. Taakkua 2018-imi 2019-imilu pilersaarutit malinneqarpata naammassineqassasut naatsorsuutigineqarluni. Inuit Ataqatigiit tamanna akuersaaruminaatsippaat.

Aamma atuaruk VIDEO Mittarfiit pillugit oqallinneq aningaasalersuinissaq pissutigalugu sivisunaaraat

- Ullumikkut aaqqissuussisimaneq kanngunaqaaq. Nunatsinni mittarfeqarnikkut aaqqissuussisimaneq iluatsinngitsoorujussuarnikoq nangiinnarlugu ingerlanneqarsinnaanngilaq. Taamaattumik illoqarfiit assigiinngitsut misigissuseqarfigineri aallaavigiinnarlugit tallineqaqqattaarsinnaanngillat pilersorneqaqattaarsinnaanatillu, Kalistat Lund ippassaq oqallinnermi oqarpoq.

Illuatungiliuttut aappaata Partii Naleqqap mittarfiit pillugit siunnersuutit ataatsimoortut aamma akerleraat. Mittarfiliornialikkersaarnerit piviusunngortinneqassappata 2 milliardit koruuninik aningaasartuutaasussaapput.

Siunnersuutigineqartoq Sanaartornermut Ataatsimiititaliamut innersuunneqarpoq. Inatsisartunilu decembarip ulluisa aappaanni aappassaaneerneqassalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat