Kalaallit Nunaata unammiuaarfiunissani kinguartippaa

Issittumi Nunallit timersuutinik unammiuaarnissaat, Arctic Winter Games, siusinnerpaamik 2018-imi Nuummi pissaaq. Tamanna Naalakkersuisut aamma Kommuneqarfik Sermersuup isumaqatigiissutigaat.
Allattoq Jaaku Lyberth
septembarip 23-at 2009 11:26

Nunatta karsiata aamma Kommuneqarfik Sermersuup aningaasatigut ajornartorsiornerata kingunerisaanik, Issittumi Nunallit timersorlutik unammiuaarnissaat Nuummi ukioq 2014-imi pisussaagaluaq akissaqartinneqanngilaq. Aviisi Sermitsiaq nittartakkamini taamatut allaaserisaqarpoq.

Timersorneq pillugu Naalakkersuisup, Mimi Karlsenip, Kommuneqarfik Sermersuullu borgmesteriata, Asii Chemnitz Narupip, ataatsimeeqatigiinnerisa kingorna tamanna aalajangiunneqarpoq.

- Nunatta karsiata aningaasatigut inissisimanera pissutigalugu unammiuaarnissat Nuummi pisussaagaluit kinguartinneqarput, Mimi Karlsen oqarpoq.

Issittumi nunallit timersuutinik unammiuaarnissaat tulleq aappaagu marsip qaammataani Canadami Albertami illoqarfimmi Grande Prairiemi pissaaq, pilersaarutaavorlu Kalaallit Nunaata peqataatitaqarnissaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq