Naleraq: Kalaallit Nunaat Ruslandimut akeraasariaqanngilaq

Issitumi Sakkutooqarfiup aasaanerani piginnaaninngoriartorpoq. Sakkutuut umiarsuaat Niels Juul, Issitumi tunngaviusumik ilinniarneq, sakkutuut aqutsisuinut ilaasut, helikopterit marluk kiisalu F-16-it marluk sungiusarnernut peqataassapput. 

Tassunga atatillugu Naleqqap siulittaasua Pele Broberg ernumassuteqarluni oqaaseqarpoq.

Sakkutooqarfiup piginnaasai nutaat Ruslandimit ajorsitsaarinertut isigineqarsinnaanera, taamaalillunilu Kalaallit Nunaata sakkutuulersornikkut saassutaasaqqissutut isigisaalernerarluni.

–Ajorinngilarput nunatsinni nakkutilliisoqarnissaq aammalu uppalungaarsimanermut tunngassutilinnik suliaqartoqarnissaq. Ajuusaarutigisarput tassaavaoq, avammut nipeqartinniarsarisaq tassaasoq, nunarput sakkulersorfiusoq aammalu uagut akeqqersimaarluta allanut inissisimanialertugut, Pele Broberg taama oqarpoq. 

Russit akeqqatut

Ruslandip Issittumi sakkutooqarfiit 24-it 2014-miilli ammarsimavai – tassa NATO-mut ilaasortat Issittumiittut tamarmik katillugit pilersitaannit pingajorarterutaannit amerlanerusut. Reuters 2022-mi taama allapput.

Ruslandip sakkutuulersornera peqqutigalugu aasakkut sungiusarnernik amerlisaanermut tunngaviusoq, Issittumi sakkutooqarfiup pisortaanit oqaatigineqarpoq.

Pele Brobergip piginnaasanissarneq akerlerinngikkaluarlugu, taama piginnaasanissarneq sakkutuulersornermik pinnani innutaasunut sullisinermut tunngatinneqartariqartoq isumaqarpoq.

USA-p nakkutiginninnermut pisariaqartitaqarnera ilisimavarput, taamaattumillu aamma uagutsinnut taamaattumik pisariaqartitsineq atuuppoq. Sakkutooqarnerulernermut akerliuunngilagut, kisianni sakkutuulersuinikkut piareersarneq ajorsitsaarutaasinnaasoq akerleraarput.

Kikkut eqqarsaatigalugit taama sakkutuulersuineq ernumanartoqartippiuk?

– Tamanna Ruslandimut ajorsitsaarinerusinnaavoq. Taamaattumik sakkutuulersuineq pillugu oqallinnerit – soorlu franskit sakkutui qaaqquneqarmata – pissutsit SAR-imut nakkutiginninnermullu samminngippata, namminersornermut Ruslandip aarlerinartorsiortinneqarsinnaanera annertusisinnaavoq.

Kalaallit Nunaat sakkutooqarnikkut pingaaruteqartorujussuugaluartoq, Ruslandip aarlerinaatai Norgimut sammiveqarput, Forsvarsakademimi Issittumi Nakkutilliinermut Ilisimatusarfimmi lektori, Jon Rahbek-Clemmensen, naliliinermini KNR-imut oqarpoq.

Kalaallit Nunaanni annertunerusumilluunnit sakkutuulersuisoqaraluarpat, Ruslandi aarlerinarsisussatut isigineqarsinnaanngitsoq, taanna isumaqarpoq.

Danmarkimut oqariartuut sakkortooq

Ministeriunerup Mette Frederiksenip sapaatip akunnerata siuliani KNR-mut oqaatigaa, sakkutuulersuinissaq pisariaqartoq, pissutigalugu Ruslandip Killiit – Kalaallit Nunaat ilanngullugu – akerleriiffittut isigimmagit. Assi © : KNR / Markus Valentin

Kalaallit Nunaat Ruslandip sakkutooqarnikkut anguniagarisimanngikkaa, aammalu Ruslandi akeqqatut isigineqanngikkaluartoq, tamanna Danmarkip ministeriunerata Mette Frederiksenip allanngortinniarsarigaa, Pele Broberg isumaqarpoq.

– Mette Frederiksenip pissusilersornera aamma oqaasii eqqarsaatigalugit ernumavunga. Kalaallit Nunaat Ruslandimut akeraasoq oqariartuutigaa, tamannalu uagut sinnerluta oqaatigineqarpoq. Taamatut oqaaseqarnermi mianersornissaq pingaaruteqarpoq.

Kisianni oqaatsit taakku oqaatigineqarsimanngilai.

– Oqariartuummut tassunga qanillilluinnarpoq, Pele Broberg oqarpoq.

-Taamaammat massakkut akeqqersimaartinniarsaraluta nunanut allanut danskit iluatsitsinerat uagut isumaqatiginngittorujuuarput, Pele Broberg taama oqarpoq