Kalaallit Nunaat Issittumi siunnersuisoqatigiinni aqutsisunngortoq
Issittumi siunnersuisoqatigiit Kunngeqarfiup Danmarkip pisortatigoortumik qaammatip tulliani siulittaasoqarfik nangissavaa. Siulittaasoqarfik Danmarkip, Savalimmiut nunattalu akornanni agguagaasoq, Kalaallit Nunaatali oqaluuserisassat aalajangiiffigisassagai pingaaruteqartoq erseqqippoq.
Taama issittoqarfimmi aamma naalagaaffeqatigiinni immikkut sammisaqarluni illersornissamut ilinniarfimmi lektori, Marc Jacobsen naliliivoq.
- Issittoq pineqartillugu naalagaaffeqatigiinnermi Kalaallit Nunaat oqaaseqartartuunissaa ajugaasimaarutaavoq pingaarutilik. Oqaluuserisassat siulittaasoqarfimmut ingerlateqqinneqartut, kalaallinit sunnerneqangaatsiassaaq, taanna oqarpoq.
Issittumi siunnersuisoqatigiit siulersuisoqatigiivisa nutaamik aaqqissuunneqarnera, naalagaaffeqatigiit pineqartuni assigiimmik nalimmassaasoqarnissaanik politikerit pimoorussisut, Marc Jacobsen isumaqarpoq.
Taama nutaamik aaqqissuussineq Kalaallit Nunaannut ukiuni tulliuttuni marlunni iluaqutaaginnarani, Issittup ineriartorneranut sunniuteqassasoq, Marc Jacobsen isumaqarpoq.
Siulittaasoqarfiup avinneqarnerata, Kalaallit Nunaata nammineq ingerlasinnaanera Issittullu ineriartornerani qitiulluinnarsinnaanera takussutissiinermik periarfissiisinnaavoq.
-Vivian Motzfeldtip (S) amerikamiut russillu nunanut allanut ministeriinik ataatsimeeqateqartalersinnaanera qiviaraanni, nunarsuarmioqatitta ersarissumik takusinnaalissavaat qanoq nunatsinni oqartussat pingaaruteqartigisut, - pingaartumik Danmarki peqataatinneqanngippat, Marc Jacobsen oqarpoq.
Massakkorpiaq Ukrainemi sorsuttoqarnera pissutigalugu Issittumi siunnersuisoqatigiit qanoq sunniisinnaatiginerat annikittoq, taanna erseqqissaavoq.
Navianaatilik
Ukiuni aggersuni Kalaallit Nunaanni oqartussat qanoq naleqarnertik, aamma qanoq sunniisinnaanertik uppernarsarnissaanut periarfissaq ammaraluartoq, navianartorsiortitsineq avaqqunneqarsinnaanngilaq.
Kalaallit Nunaat, Danmark Savalimmiullu siulittaasoqarfitsik, Issittumi attanneqarsinnaasumik ineriartornerup qulakkeernissaanut atussamaarpaat, avatangiiseq nunallu inoqqaavi eqqarsaatigineqarlutik.
Oqallisissat præsident Donald Trumpip pingaartinngisai, Marc Jacobsen oqarpoq.
- Attanneqarsinnaasumik ineriartorneq nunallu inoqqaavisa pisinnaatitaaffii pillugit Donald Trumpip eqqartussallugit tapersissallugilluunniit iliuuseqanngilaq - naamerluinnaq.
Marc Jacobsenip ilaatigut pisoq 2019-imeersoq, Finlandimi Issittumi siunnersuisoqatigiit inaarutaasumik nalunaarusiaanut ’silap pissusiata allanngoriartornera’ nalunaarusiammi ilaanera pissutigalugu USA-p atsiorumasimannginnera uparuarpaa.
Qanittukkut Donald Trumpip USA-mi qaqqat portunersaat Mount Denali peqqussutitigut aqqa nutaanngitsoq Mount McKinley-mik ateqalerteqqippaa. Denali portusuumik isumaqartoq, Alaskami nunat inoqqaavisa atsiunnikuugaluarpaat.
Uumasut nujuartat nujuillisarneqassasut
Ruslandip Ukrainemut suli sorsunnera, Issittup siunnersuisoqatigiivinit soqutiginngitsuusaarneqarsinnaanngilaq. Taammaattoqarnerata Issittup siunnersuisoqatigiivini killerni ilaasortaasunut arfineq-marlunnut Ruslandimik suleqateqarneq unitsikkallarpaat.
Arriitsumilli Rusland kingumut peqataajartortinneqaqqilerpoq, kisianni suleqatigiisitat siunnersuisoqatigiit ulluinnarni suliarisartagaannik nakkutiginnittuusut.
Tamatumi ingerlanerani Donald Trumpip Canada aamma Kalaallit Nunaat tiguarniarlugit oqalulerpoq – nunat taakku marluk siunnersuisoqatigiinni ilaasortaasut ilisimaneqareersoq.
Siulittaasoqarfiup ilaatut siunnersuisoqatigiit ingerlaannarnissaat Kalaallit Nunaata suliassaasa pingaarnerpaartarissavaa. Nunarsuarmioqatigiit inatsisit atorlugit aaqqissuussisimanerannik tunngaveqartumik kattuffissuit Donald Trumpip illuatungilerniarmagit suliaq taanna naammassiuminartuunngilaq.
- Ruslandi inip iluani allarsuusoq USA nagguaatsuuvoq. Nunat taakkua marluullutik ilaasortaajunnaarpata Issittumi siunnersuisoqatigiiverutissaaq. Trumpip naalakkersuisuisa Issittup siunnersuisoqatigiivi pingaaruteqartutut piffissamillu atuiffiusariaqanngitsutut, taamaattumillu tassunga akersuutinngiinnarnissaat neriuutaasinnaavoq, Marc Jacobsen oqarpoq.
