Naalakkersuisup nunatsinni Danmarkimilu politikerit akornanni pitsaanerusumik attaveqaqatigiittoqartikkusukkaa
Folketingimi Nunanut allanut tunngasunut ataatsimiititaliami ilaasortat Kalaallit Nunaata, Danmarkip USA-llu akornanni pissutsit maanna pissanganartut pillugit ministerinit marlunnit sapaatip-akunnerani kingullermi ilisimatinneqarmata, Nuummit Pipaluk Lyngep (IA) isornartorsiuinera maluginiarneqarpoq.
- Folketingip Nunanut allanut tunngatillugu Aalajangiisartui peqataatinnata immikkut ittumik ataatsimiipput. Tamanna akuersaarsinnaanngilara, taanna oqarpoq.
Danskit naalakkersuisuisa naalagaaffeqatigiinneq sinnerlugu nunanut allanut politikki ingerlatissagaat Danmarkimi tunngaviusumik inatsimmi allaqqavoq.
Pipaluk Lyngep, Inatsisartuni Nunanut Allanut Sillimaniarnermullu Ataatsimiititaliami siulittaasup, ataatsimiititaliami ilaasortat Folketingimi ataatsimiinnermut qaaqquneqannginnerat paasiuminaatsippaa. Pingaartumik maanna pissutsit ullut tamaasa, nalunaaquttap akunneri tamaasa allanngorartuartillugit.
Ataatsimiititaliap siulittaasuata Inatsisartuni politikerit Folketingimi ataatsimiititaliani ilaasortaasut assigalugit – piffissaq eqqorlugu – paasissutissinneqartarnissaat ukiorpassuarni piumasaraa.
Nunanut allanut tunngasunut naalakkersuisup Vivian Motzfeldtip (S) isornartorsiuineq tamanna taperserpaa.
- Ullumikkut pissutsit takutippaat Inatsisartut ministerillu attaveqaqatigiinnerat piorsarneqartariaqartoq aamma attaveqaqatigiittarfissamik nutaamik aqqutissiuisoqartariaqartoq, Vivian Motzfeldt tallimanngornermi apersorneqarluni oqarpoq.
Ataatsimiititaliamut saaffiginninnerit
- Aaqqissuussineq ullumikkut atuuttoq naapertorlugu, Inatsisartunut ilaasortat nunanut allanut tunngasunut ataatsimiititaliami ataatsimiinnernut peqataanissaat periarfissaanngilaq, Ulrik Pram Gad, Dansk Institutimi Nunat tamalaat pillugit ilisimatusartoq taama nassuiaavoq.
Danskimmi naalakkersuisuisa Folketingimi nunanut allanut tunngasunik ataatsimiititaliap isumasiorneqarnissaa akisussaaffigaat, naalakkersuisullu Inatsisartuni nunanut allanut sillimaniarnermullu ataatsimiititaliamut paasissutissiinissaq akisussaaffigalugu.
- Danskit naalakkersuisui nunanut allanut tunngassutilinni pingaarutilinnik aalajangiitinnatik, nunanut allanut tunngasunut ataatsimiititaliaq isumasioqqaartariaqaraat, Danmarkimi tunngaviusumik inatsimmi allaqqavoq.
- Taava Inatsisartuni nunanut allanut sillimaniarnermullu ataatsimiititaliaq aamma ilisimatinneqartassasoq isumaqatigiissutaavoq, nunanullu allanut tunngasunut naalakkersuisup tamanna ilisimatitsissutigissagaa, Ulrik Pram Gad oqarpoq.
Kalaallit Nunaata Danmarkillu nunatut assigiinngitsutut politikikkut aaqqissuussaanerat tunngavigalugu isumaliutersuutaasoq, Ulrik Pram Gad nangilluni oqarpoq.
Kalaallit Nunaanni nunanut allanut sillimaniarnermullu ataatsimiititaliaq Folketingimi ataatsimiititaliatulli siunnersuinermik suliaqarfiunngilaq. Ataatsimiititaliap apeqquteqartarnermigut paasissutissanik pissarsiniarnissaq nammineq akisussaaffigaa.
- Danskit naalakkersuisui, tunngaviusumik inatsit naapertorlugu, nunanut allanut tunngasunik ataatsimiititaliamut isumasiueqqaarnissamut pisussaaneratulli, naalakkersuisut iliuuseqannginnerminni inatsisartunut apeqquteqaqqaarnissamut pisussaatitaanngillat, Ulrik Pram Gad nassuiaavoq.
Tamatigut ilanngunneqartassasut
Vivian Motzfeldt isumaqarpoq aaqqissuussineq allanngortinneqartariaqartoq.
- Oqaloqatigiinnerit eqaannerulernissaat pisariaqartipparput, Nunarpullu eqqartorneqaraangat nunatta tamatigut peqataatinneqartarnissaa pingaaruteqarluinnarpoq, Vivian Motzfeldt oqarpoq.
Folketingimut ilaasortat kalaaliusut marluk, Aaja Chemnitz (IA) aamma Aki-Matilda Høegh-Dam (N), aaqqissuussineq maanna atuuttoq aamma pakatsissutigaat.
Nunanut allanut tunngasunut ataatsimiititaliami ilaasortaagamik ataatsimiinnerni peqataasarput, nipangiussisussaatitaappulli. Taamaattumik nunatsinni parteeqatitik ataatsimiinnerni paasissutissiissutigineqartut pillugit ilisimatiinnarsinnaanngilaat.
- Inatsisit allanngortittariaqarpagut, maannami malittarisassat ima sukannertigaat Inatsisartut Nunanut Allanut Sillimaniarnermullu Ataatsimiititaliaata peqataatinnissaa ajornakusoortorujussuulluni, Aaja Chemnitz sisamanngormat oqarpoq.
Naak inatsimmik allannguineq aaqqissuussinerup maannakkut atuuttup, paasissutissat naalakkersuisunit allanit inatsisartunut ingerlateqqinneqartarneranik imallip, allanngornissaanik kinguneqarumaartoq, Vivian Motzfeldtip Inatsisartut Folketingimi ataatsimiititaliat ataatsimiinnerinut peqataasinnaalernissaat isumaqataaffigaa - taamaattumillu aamma inatsimmik allannguisoqarnissaa.
- Paasissutissiinerit pitsaasuunissaat naligiissitsinissaallu tamanut angorusunnarpoq, Motzfeldt oqarpoq.
Oqaluttuarisaanerup ingerlanerani misilittakkat
Vivian Motzfeldtip inatsisit allanngortinneqarnissaat tapersersormagu, ullumikkut aaqqissuussaanerup ataqatigiinnginneranik nassuerutiginnittoqartoq, Ulrik Pram Gad isumaqarpoq.
- Naalagaaffeqatigiiffiup tatineqarnerani pissutsillu pisarnermisut sukkassuseqarlutik pitillugit, periutsit allanngortikkuminaatsut maannamut isumaqatigiissutaasimasut iluatsippallaannginnerannik kalaallit tungaannit takunninneruvoq.
USA-mik ajornartorsiuteqalernerup nalaani taama oqallittoqarnera qanoq ersersitsiva?
- Danmarkip Kalaallit Nunaat avaqqullugu aalajangiisarnera aamma paasissutissiinissaminik puiguisarnera piaaraluniluunniit isertuussisarnera, Kalaallit politikeriisa oqaluttuarisaanerup ingerlanerani misilittagaqarluarfigaat - pingaartumik qangaaniilli. Taamaattumik taamatut qisuariartoqarneranut pissutissaqarluarpoq.
- Danskit oqartussaasuisa periutsit isumaqatigiissutigineqarsimasut maleruarumaaraat naatsorsuutigisariaqarparput, piumaneruneqassappallu allatut periuseqarnissaq qinnutigineqartariaqarpoq, Ulrik Pram Gad oqarpoq.
Nunanut allanut tunngasunut ataatsimiititaliaq marlunngornermi ataatsimeeqqippoq, ataatsimiinnermilu Kunngeqarfiup USA-mut attaveqarnera oqaluuserineqartutuaavoq.
Inatsisartuni Nunanut Allanut Sillimaniarnermullu Ataatsimiititaliami ilaasortat ataatsikkut paasissutissinneqarput - siullerpaamik. Pipaluk Lynge Sermitsiamut taama ilisimatitsivoq.
- Killiliinerma kingorna taamatut pisoqarpoq, Pipaluk Lynge Sermitsiamut oqarpoq.
