Kalaallit nerisassaannik nioqqutissanillu nunatsinneersunik neriniartarfiliulersoq
Iggarissorsuaq Inunnguaq Hegelund, nunatsinni nunattalu avataani nerisassiarisaminut nersugaasoq, neriniartarfimmi nutaami Kalaaliaqqamik taaguuserneqartumi igasuussaaq.
Aqqusinerni igaffiit street foodillu soorlu New Yorkimi nassaassaasut Kalaaliaqqamut isumassarsisitsisuupput.
Neriniartarfittaassarlu, kalaallit nerisassaannik nioqqutissanillu nunatsinneersunik tunngaveqartussaq, imerniartarfiup Takussip maanna inissisiamaffiani ammarallaqqaassaaq.
- Amerlasuunit oqaluuserineqartarpoq, nunatsinnili illoqarfiit pingaarnersaanni kalaallit nerisassaannik ukkatarinnittumik neriniartarfeqanngilaq. Tamanna maannakkut iliuuseqarfigaarput, Inunnguaq Hegelund neriniartarfittaassaq, immiorfimmit imerniartarfiutilimmiillu HECA A/S-imit pilersinneqartussaq pillugu taama oqarpoq.
- Aanaap aalisakkanut, qalerualinnut suaasanullu igariaasia nutaaliartalik maanna saqqummiunneqassaaq, iggarissorsuaq nassuiaavoq.
Kalaaliaraq Takussimi marsip aappaanit apriilip tungaanut ammarneqarallassaaq, Nuummiuniillu nuannarineqassappat neriniartarfiup ammaannarnissaa HECA-p neriuutigaa.