USA-p præsidentia Donald Trump timmisartoq Air Force One ilaaffigalugu Washington D.C.-p eqqaani sakkutooqarfimmut Joint Base Andrewsimut pingasunngornerup unnuaani mippoq.

Air Force One-mi inuttat teknikikkut ajornartorsiuteqalaartoq paasigamikku tassani timmisartumut allamut ikivoq.

Nutaarsiassaqartitsiviup Reutersip nutaarsiassiinera naapertorlugu Præsidentip Illorsuanit taama ilisimatitsisoqarpoq.

Timmisartoq teknikikkut ajoquteqarmat sillimaniarneq pissutigalugu timmisartoq uterpoq Amerikamiullu sakkutooqarfiannut milluni, nalunaarutigineqarpoq.

Trump aningaasaqarneq pillugu ataatsimeersuarneq World Economic Forum peqataaffigisussaammagu, timmisartoq Schweizimut ingerlaartussaagaluarpoq.

Timmisartumi inuttat ajornartorsiut suna paasisimaneraat Præsidentip Illorsuanit ilisimatitsissutigineqanngilaq.

Akunnerit pingasut kinguaattoortoq

Præsidenti timmisartumut Boeing 757-imut mikinerusumut USA-p nalunaaqutaa malillugu unnuap qeqqa qaangiutiinnartoq – Kalaallit Nunaata nalunaaqutaa naapertorlugu unnuakkut pingasunut – ikivoq.

USA-mi præsidenti ilaasoralugu timmisartoq taanna Air Force Onemik maannakkut taaguuteqarpoq, tassami timmisartoq sakkutuut timmisartortartuanneersoq USA-p præsidentianik ilaasulik taama taaneqartarmat.

Timmisartoq suugaluaraangalluunniit præsidentimik ilaasoqartillugu Air Force Onemik taaneqartarpoq.

Reutersip nutaarsiassiinera naapertorlugu USA-p aningaasaqarnermut ministeria Scott Bessent oqarpoq Trump pisoq pissutigalugu, naatsorsuutigisamit nalunaaquttap akunnerinik pingasunik kingusinaarluni aningaasaqarneq pillugu ataatsimeersuarnermut takkutissasoq.

Joint Base Andrews sakkutooqarfiuvoq Marylandimiittoq, USA-p illoqarfiit pingaarnersaata, Washington D.C.-ip kujataata kangiatungaani 13 kilometerit missaanni ungasitsigisumi inissisimasoq.

Præsidentip timmisartua tassani meqqavoq aserfallatsaaliorneqarlunilu.

Kalaallit Nunaat pillugu ataatsimiinnerpassuit

Trumpip World Economic Forumimi oqalugiarnissaa pingasunngornermi pilersaarutaavoq, USA-llu præsidentiata Kalaallit Nunaannik aqutsinissamik kissaateqarnera tassani sammineqarluarsimaqaaq.

- Kalaallit Nunaat pillugu ataatsimiinnerpassuit pilersaarutigaagut, isumaqarpungalu ingerlalluassasut, Trump tusagassiortunik marlunngornermi katersortitsinermi oqarpoq.

Aamma Kalaallit Nunaat aqunniarniarlugu qanoq iliuuseqarusutiginini erseqqissumik oqaatigiumanngilaa.

- Paasiumaarpat, tusagassiortumut akivoq.

Trumpip Kalaallit Nunaat pillugu oqaaseqaatini sioorasaarutinilu piffissami kingullermi sakkortusiartortippaa, Kalaallit Nunaat Amerikamiunit tiguarneqarnissaa kissaatigigamiuk.

USA-p præsidentiata Danmark Europamilu nunat arfineq-marluk allat februaarip aallaqqaataanit akitsuutinik  ilasiffiginiarlugit sapaatip akunnerata naanerani sioorasaarpai, USA Danmarkilu Kalaallit Nunaat pillugu niueqatigiinnissaminnik isumaqatigiissuteqanngippata.

Tamannali ilutigalugu USA-mi eqqartuussisuuneqarfimmit aalajangiisoqarnissaa utaqqineqarpoq, Trumpip akitsuutinik ilasinissamut ajornartoornermi inatsisinik atuisinnaajunnaarnissaannik kinguneqarsinnaasumik.

EU-mi siuttut Bruxellesimi immikkut ittumik sisamanngornermi ataatsimeeqatigiissapput. Trumpip sioorasaarineranut qanoq periaaseqarsinnaaneq tassani eqqartussavaat.

/ritzau/