Naalakkersuisut ajornartorsiornissamut sillimanissamut siunnersuutit piareeraat - ima iliussaatit

Pinngortitamut Avatangiisinullu Naalakkersuisoqarfiup quppersagaaraq ajornartoortoqassagaluarpat imminut ulluni tallimani napatinnissamut siunnersuutitaqartoq saqqummiuteqqammerluinnarpaa.

Allattoq Nicole Sander Bertelsen

januaarip 21-at 2026 14:01

Nutserisoq Connie Fontain

Naalakkersuisut quppersagaaraq ajornartoortoqassagaluarpat imminut ulluni tallimani napatinnissamut siunnersuuteqartoq saqqummiuteqqammerluinnarpaat.

Pinngortitamut Avatangiisinullu Naalakkersuisoqarfik tusagassiuutinut nalunaarummi allappoq.

Quppersagaaraq ”Ajornartoornermut piareersarneq – ullut tallimat ingerlanerini napatinnissannut piareersarit” innuttaasut toqqissisimanerunissaat aamma inuiaqatigiinni upalungaarsimasuutitat tamarmiusut nukittunerulernissaat qulakkeerniarlugu suliarineqartoq, tusagassiuutinut nalunaarummi allassimavoq.

- Angerlarsimaffiit suliassaannik siunnersuutillu paasiuminartut pillugit quppersagaaqqamik saqqummersitsineq ajornartoortoqarnissaanik naatsorsuuteqarnitsinnik oqariartornerunngilaq, aalisarnermut, piniarnermut, nunalerinermut, imminut pilersornermut avatangiisinullu naalakkersuisoq, Peter Borg (D) tusagassiuutinut nalunaarummi allappoq.

Naalakkerusisoqarfiup inoqutigiinnut siunnersuutai aaku

Imissaq:

Ullormut unnuamullu ataatsimut inummut ataatsimut 3 liter
Uumasuutinut imeq

Nerisassat:

Ullunut tallimanut nerisassat sivisuumik atasinnaasut ajornanngitsumillu piareersarneqarsinnaasut
Aallaasit, paassat aalisaatit

Nakorsaatit ikiueqqaarnerlu

Inoqatigiinnut nakorsaatit pisariaqartut.
Ikiueqqaarnermi atortut

Eqqiluisaarnermut atortut:

Equutissiat
Assannut tunillaannartuiaatit
Nangit, naleqquttat/tamponit illoqativilluunniit pisariaqartitaat allat.
Imermut tanki

Kiassarneq:

Tæppit, oqorutit, atisallu oqartut
Varmedunki
Kiassaatit allat (naneruutit, ikumasartoq, kiassaatit assartorneqarsinnaasut.
Ajornartoornermi generatori orsussarlu

Pisariaqartitat allat:

Powerbanki immeriigaq imaluunniit batteriit poortat assersuutigalugu oqarasuaatinut angallattakkamut.
Qaammartartoq
Batteriit
Akiliutit (pinkodi eqqaamallugu) aningaasallu aggorsimasut.
Naneruutit ikitsisillu

Immikkut pisariaqartitsisut:

Inoqutigiit meerartaqarpat imaluunniit utoqqartaqarpat?
Assersuutigalugu silarluttartumi imaluunniit sikusartumi najugaqarpit?
Angallatigineqakulanerit atorneqarsinnaanngippata allanik angallatigisinnaasannik periarfissaqarpit?
Ikiuussinnaavit imaluunniit ilaquttannit, sanilinnit ikinngutinnilluunniit ikiorneqarsinnaavit?

Attaveqaqatigiinneq:

FM-radio battereeqartoq/amoortagaq/seqernup qinngorinernit ingerlasoq (biilit radioat).
Oqarasuaatit normui pingaarutillit (ilaquttat, sanilit upalungaarsimanermilu oqartussat)?
VHF, InReach qaammataasakkulluunniit attaveqaat alla

Paasissutissarsiffik: Quppersagaaraq ”Ajornartoornermut piareersarneq – ullut tallimat ingerlanerini napatinnissannut piareersarit” Avatangiisinut Pinngortitamullu Naalakkersuisoqarfimmeersoq

Ataasiakkaanut ikiuineq aamma ataatsimoornermit nukittorsaaneq

Naalakkersuisoqarfiup atuagaaneq inuiaqatigiinni ernumassutigineqartut pillugit suliaanngitsoq erseqqissaatigaa, taannali akisussaassuseqartumik pilersaarusiornerulluni.

- Siunnersuusiorpugut akisussaaffimmik tigusisoqarnissaanik aamma piffissaalluarallartillugu piareersimanissamik iliuuseqartoqarnissaanik quppersagaaraq siunertaqartutut paasineqassaaq. Piareersarneq eqqissinermik pilersitsisarpoq, aamma imminut napatissinnaanermik inunnillu allanik ulluni arlalinni ikiunissamut nukissaqalersitsisarluni, taamaalilluni ataatsimoorluni nukittunerulersitsinermik aamma pilersitsisarluni, Peter Borg oqarpoq.

- Innuttaasut imminnut qanigisaminnullu sapinngisamik piffissami sivikitsumi napatissinnaassappata, oqartussat pisariaqartitsinerpaanik samminninnissartik sammisinnaalissavaat - aamma pisup nalinginnaasunngortinnissaanut sukkasuumik suliaqarsinnaalissallutik, naalakkersuisoqarfik allappoq.

- Siunnersuutit malikkutsigit, inuttut ataasiakkaatut nukittunerulissaagut, inuiaqatigiittullu nukittunerulissalluta, Peter Borg oqarpoq.

Atuagaaqqap suliarineqarnera piffissami sivisuumi sivikitsumillu innaallagiaaruttarnerit arlallit tunngavigalugit siornaak (2024 aaqq.) aallartinneqartoq, naalakkersuisoqarfik allappoq.

Upalungaarsimasut piareersimasut

Nunatsinni upalungaarsimasut ajornartoornermik sunniuteqarluartumik, akisussaaffinnillu isumaginninnissamut aamma ingerlatsiviit oqartussallu akimorlugit pitsaasumik suleqatigiinnissamut piareersimasut naalakkersuisup tusagassiuutinut nalunaarummi erseqqissaatigaa. Taamaammat innuttaasut toqqissisimalluinnarsinnaapput.

- Nunatta upalungaarsimasuutitaasa piareersimaneri innuttaasut qularutigissanngilluinnarpaat, aamma upalungaarsimasutut suliassat suliassanik ilisimasalinnit, misilittagalinnit suliassaqarfimmillu ilisimasalinnit suliarineqarnissaat - aamma pisoq immikkorluinnaq ittuutillugu suliarineqassaqqaartut ilisimassavaat. Ajutoortoqarnerani eqaatsumik suliarinnittussaqarpugut, erseqqissumik akisussaaffilersuisoqareerluta aamma immikkoortortaqarfiit immikkoortuini oqartussanilu nukittoorujussuarmik suleqatigiittartunik peqarluta, Peter Borg oqarpoq.

Quppersagaaqqami imeq, nerisassat, nakorsaatit, kissartoqarneq attaveqaatillu pingaartumik immikkut pisariaqartitsineq eqqarsaatigalugu ilaatigut ilitsersuutigineqarpoq.

Siunnersuutit ilitsersuutaapput, illoqatigiinnilu ataasiakkaat, aningaasaqarneq najukkamilu pissutsit aallaavigalugit naleqqussarneqassasut, naalakkersuisoqarfik allappoq.

Quppersagaaraq ”Ajornartoornermut piareersarneq – ullut tallimat ingerlanerini napatinnissannut piareersarit” naalakkersuisoqarfiit, kommunit, Kalaallit Nunaanni Politiit, Issittumi Sakkutooqarfiup akornanni suleqatigiinnikkut aamma suliffeqarfinnit Namminersorlutik Oqartussat pigisaannit ilassuteqarfigineqarneratigut pilersinneqarpoq. Siunnersuutittaaq Kalaallit Nunaanni Upalungaarsimanermut Ataatsimiititialiami oqaluuserineqarput.

- Inuiaqatigiittut nukittunerpaaffitta ilisarnaatittalu ilaat ataaseq tassaavoq ikioqatigiillaqqissuserput, aammalu ajornartoornerit naatsorsuutiginngilluinnakkamik pisinnaasarnerat nalunnginnatsigu. Piareersarluarsimanissaq ileqqoraarput, silap qanoq innerata silallu pissusiata unerisimanngitsuusarnerat ulluinnarsiutigigatsigu. Ilaanneeriarluta pisunit immitsinnut sanngiinnerulersittarnerput misigisarparput, soorlu tamanna innaallagiaarunnermi misiginikuugipput. Taamaattumik - ataasiakkaatut aammali inuiaqatigiittut - piareersarnissarput aamma pingaaruteqarpoq. Sunik tamanik sapigaarunnissaq imaluunniit suut tamarmik ataatsikkut pissarsiarineqarnissaat naatsorsuutigineqanngilaq, kisiannili piareersimannginnermit piareersimaneq pitsaaneruvoq.

Danmarkimi Upalungaarsimanermik Aqutsisoqarfiup danskit 2024-mi juunimi piareersaqquai.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.