Donald Trump: Suli sioorasaarisoq, kisianni sakkutuunik atuissannginnerartoq
Amerikamiut præsidentiata, Donald Trumpip Davosimi oqalugiarnermini Kalaallit Nunaannut pilersaarutini iserfigineruai.
Donald Trumpip Kalaallit Nunaannik piginnikkusunnini USA-p Natomut piffissap ingerlanerani tunniuttagaanut sanilliullugu annikinneerannguusoq oqalugiarnermini arlaleriarluni oqaatigaa.
- Sikumininnguamik, nillertumik inissisimanerluttumillu nunarsuarmi eqqissinermut qulakkeerinnissutaasinnaasumik piumasaqalaaginnarpunga. Natomut tunniussimasatsinnut sanilliullugu kissaatimininnguuvoq.
Donald Trump oqalugiarnermini Kalaallit Nunaannut sakkutooqarnermik atuissannginnerarpoq.
- Qinnuiginninngisaannarpugut (Natomut aaqq.), aamma piumasaqanngisaannarpugut. Pissaanermik ingattarserlunga atuinngikkuma. Taamaaliornavianngilanga. Anersaajallassagunarpusi.
Siullerli eqquutivinngilaq. USA-p Europami nunani sakkutooqarfinnik siusinnerusukkut inissiiumavoq.
Tamatuma saniatigut Natomi artikel 5 ataatsimut tamanut, tamarmut ataatsimumik taaneqartartoq nunani kisiartaalluni aallartinnikuuaa. Tamanna World Trade Centerip 2001-imi septembarip aqqarnanni peqqarniisaarnianit saassunneqarnerani pivoq.
Sioorasaarinerit allat
Nato-mi nunat Kalaallit Nunaannik USA-mut tunniusseqataanianngippata Donald Trumpip tamanna USA-p eqqaamajumaaraa sioorasaarutigaa.
Taassuma nunanik illersuiniarluni oqaaseqarnerata kingorna tamanna oqaatigaa, taassuma nunat USA-mut illersuiniarnersut nalornissutigaa.
- (Kalaallit Nunaannik tigusinissaq aaqq.) akuerisinnaavat imaluunniit naaggaarsinnaavutit, tamannalu eqqaamassavarput.
Kalaallit Nunaata tiguarnissaanut erngertumik isumaqatiginninniartoqassasoq, Amerikamiut præsidentiata oqaatigaa.
- USA Kalaallit Nunaannik kisimi ineriartortitsisinnaallunilu pitsanngorsaasinnaavoq. Taamaammat tiguaanissamut erngertumik isumaqatiginninniarpunga.
Aatsitassanut tunngassuteqanngitsoq
Præsident Donald Trumpip Kalaallit Nunaannik aqutsilerusunnini aatsitassanut tunngassuteqannginnerarpaa.
- Tamanna pillugu perusunngilarput. Illersornissaq pissutigaarput.
Donald Trumpip USA-p Amerikap nunavissuini missilinut illersuummik sanaartuleruttorneranik pissuteqartoq uteqqippaa.
Uanilu Kalaallit Nunaannik piginnittuunissani pisariaqartoq oqaatigaa.
- Kalaallit Nunaat kisiat maannakkut piumavarput. Piginnittuusariaqarpugut attartornerunngilarlu. Attartornermut isumaqatigiissut kiap illersussavaa? Sorsunneqarpat missilerpassuit sikut qulaatissavaat.
- Nunap immikkoortua una Golden Domemik sanaffigerusutarput Danmarkimit taamaallaat kissaatigaarput. Taassuma Canada illersussavaa. Taanna akeqanngitsumik pissavaat. Tamanna qujamasuutigisariaqarpaat. Taamaanngillalli.
KNR-ip Golden Dome suunersoq ilanngutassiami siusinnerusukkut allaaseraa.
Oqaluttuarisaanermut tunngasumik oqaaseqartoq
Donald Trumpip oqalugiarnermini USA sorsunnersuup aappaata kingorna Kalaallit Nunaannik aqutsiinnarsimassagaluartoq isumaqarluni oqaatigaa.
- Sorsunnersuup aappaani USA-p Kalaallit Nunaat illersorniarlugu sakkutuunik aallartitsisariaqartutut misigimmat tamanna takuarput.
- Danmark sinnerlugu Kalaallit Nunaanni sakkutooqarfiliorpugut. Danmark illersorniarlugu sorsuppugut.
Præsidentip Kalaallit Nunaat inukittunnguummat nunatut taarusunngingajallugu oqaatigaa.
- Nunatut taassallugu ajornakusoorpoq. Sermerujussuaruna.
- Kalaallit Nunaat Danmarkimut piffissap ingerlanerani utertipparput. Qanoruna sianiilliornerutigisoq?
Donald Trumpip Davosimi ullumi oqalugiarnerminut tassunga atatillugu USA-p Kalaallit Nunaat Danmarkimut sorsunnersuup kingorna tunniuteqqikkaa oqaatigaa.
Tamanna eqqortuunngilaq.
Tusagassiorfik paasissutissanik misissuisartoq BBC-Verify taama allappoq.
- USA-p Danmarkillu USA-p Nazi-Tysklandip Kalaallit Nunaannik tiguaannginnissaa pissutigalugu USA-p illersuinissaanut isumaqatigiissut Sorsunnersuup aappaata nalaani 1941-mi atsiorpaat.
- Isumaqatigiissut oqartussaanermik nuussinermik ilaqanngilaq, taamaammat Kalaallit Nunaat Amerikap nunataanut ilaanngisaannarpoq.
