Kommuneqarfik Sermersuup borgmesteria, Avaaraq S. Olsen (IA), USA-p præsidentia Donald Trump Davos-imi nunarsuarmi aningaasaqarneq pillugu naapisimaarnermi oqalugiartoq tusarnaareerlugu eqqissivinngilaq.

Nuummi Ritzauimiit pingasunngornermi apersorneqarami oqarpoq.

Trumpi sakkutuulersornikkut pissaanini atorusunnagu tv-kkut oqarmat, Avaaraq S. Olsen oqiliallappoq, oqaasiili eqqissiiminissaanut naammanngillat.

- Sakkutuulersorluni pissaanini atorusunnagu oqarmat soorunami oqiliallannarpoq. Allarpassuilli piffissamut eqqissisimanarnerusumukannginnitsinnut ersiutaapput.

- Sakkutuulersorsinnaaneq eqqarsaatigalugu imaassinnaavoq eqqissiallattugut, tamannami inuit isumakuluutigeqaat. Eqqissiallatsitsivoq, kisianni nammineq erfalasoqartuarnissarput suli sorsuutigisussaarpasipparput, taanna oqarpoq.

Assi © : Fabrice Coffrini/AFP/Ritzau Scanpix

Pissaanermik atuerusunngitsoq

Donald Trumpip nunatta USA-mit pigineqalernissaanik kissaanni sivitsortumi oqaluusera. Issitoq, aamma Russit Kinamiullu soqutigisaqarfigisaat, isumannaallisimatinniarlugu taamaaliorusuppoq.

USA nukittunersuaq pissaanersuarlu atorlugit aatsaat piumasaminik pissarsisartoq, præsidenti Davosimi pingasunngornermi oqalugiarluni oqarpoq.

- Taamaaliorusunngilangali. Pissaanermik atuerusunngilanga, taanna oqarpoq.

Donald Trump Kalaallit Nunaannik aqutsileratarsinnaanermik erngertumik isumaqatigiinnialernissamut piareeqqalluni oqarpoq.

“Angersinnaavusi, taava qujamasussaagut, naaggaarsinnaavusiluunniit, taava tamanna eqqaamassavarput” kingusinnerusukkut erseqqissuliorpoq.

"Sermiminermik perusuppunga"

- Sermiminermik, nunarsuarmi eqqissisimanissamut pingaaruteqarsinnaasumik taamaallaat piumasaqarpunga. Kalaallit Nunaat illersorumallugu Kalaallit Nunaata piginissaa pisariaqartipparput, Donald Trump oqarpoq.

Trumpip “sermiminermik” oqarnera, Avaaraq S. Olsenip maluginiarpaa, taamatullu oqarneq taassuma eqqissiallaatiginngilluinnarpaa.

- Ima oqaluttupilussuugami, “sumilluunniit qinnuteqarnikuunngisaannarpugut, sermiminermillu maanna qinnuteqaannarluta”. Kalaallit Nunaat inuilu suarsuttut piniarfimmi pisiarisinnaasamisut suli taagorpai. Taamaannera isumakulunnarteqaara.

- Taamaannera Kalaallit Nunaannut inuinullu isiginninneranik, taavalu suna illersorniaraanni pigisariaqarneranut tunnganeranut uppernarsaataaginnarpoq. Uagutsinnik nunatsinnillu paasinninnikinnermik inunnillu allanik allaanerusumik isumalinnik ataqqinninnginneranut takutitsineruvoq, borgmesteri oqarpoq.