Ilulissani imeqarfiup killeqarfia pillugu ukiorpassuarni oqaloqatigiinneq

Ilulissani mittarfissamut qanittukkut januaarip aappaanni ikuallattoqarmat qatserisartut imissaaleqinerminnik ajornartorsiuteqarput.

Ikuallattoqarfiusoq illoqarfiup imermik pilersuiffianit pilersorneqanngilaq, tamanna imeqarfiup eqqaani imeqarfiup killeqarfianik ilaatigut pissuteqarpoq. Kommunip Namminersorlutik Oqartussallu imeqarfiup killeqarfia ukiuni arlalinni oqaloqatigiissutigaat.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfiup nunatsinni imeqarfiit killeqarfiinut akisussaasuuvoq. Ilulissanilu imeqarfiup killeqarfiata nuunneqarnissaa pillugu ukiuni arlalinni oqaluuserineqartoq tassannga paasissutissiissutigineqarpoq.

- Illoqarfiup allilerneqarsinnaanissaa pissutigalugu imeqarfiup killeqarfiata nuunneqarnissaa ukiuni arlalinni oqaluuserineqarpoq.

Ilulissani mittarfimmi nutaami sanaartorfiup eqqaani containerini ikuallattoqarpoq. Ikuallattoqarnerani ajoqusertoqanngilaq. Imerli nunguppoq.

Qatserisartut biilit imermik assartuutit illoqarfimmit assartuinissaannut utaqqisariaqarput. Uanilu paasinarsivoq: Ikuallanneq sakkortunerusimagaluarpat tamanna ajornerusumik kinguneqassagaluarpoq.

Avannaata Kommuniani borgmesterip, Lars Erik Gabrielsenip (S) nipini tamanna pillugu qaffappaa.

- Allannguisoqarnissaa pisariaqartinneqarpoq. Ajornartorsiuteqartugut ersarippoq. Mittarfimmut ataavarnerusumik imermik arlaatigut pilersuisoqartariaqarpoq, taanna oqarpoq.

Borgmesterip oqarnera naapertorlugu imeqarfiup killeqarfia ajornartorsiutaavoq. Inatsisimmi atuuttut naapertorlugit illoqarfiup imeqarfiata eqqaani killeqarfimmi sanaartoqqusaanngilaq. Tamanna mittarfimmut erngup aqqutaanik toqqaannartumik peqarnissamut periarfissaqartitsinngilaq.

Imeqarfiulli killeqarfia imermik pilersuinerup mingutsinneqannginnissaanut illersuineq pillugu pilersinneqarsimasoq pillugu kommunip Namminersorlutik Oqartussallu akornanni oqaloqatigiinnermi sammineqartarsimavoq.

Naalakkersuisoqarfiup oqarnera naapertorlugu Nukissiorfiit kommunillu aaqqiissutissatut siunnersuutit assigiinngitsut ukiut ingerlanerani saqqummiuttarpaat.

Nukissiorfiit suliniutip ilaanut aaqqiissutissioreerput. Aningaasanut inatsit aqqutigalugu aningaasaliisoqarpoq. Kommunilu uninngaannarsimanngilaq. Avannaata Kommuniata iliusaasinnaasut nammineerluni misissorlugit siorna aallartippaa.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsenip kommunip oqaloqatiginera aallarteqqinniarlugu kommunillu aaqqiissutissatut siunnersuutaa maanna utaqqineqartoq paasissutissiissutigaa.

- Aaqqiissutissarsiornissamut kommunip oqaloqatiginera aallarteqqikkusuppara, kommunillu tassunga siunnersuutai nutaat maanna utaqqillugit, Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen allappoq.