Ilisimatooq: Kalaallit naleqqussarnissamik kissaateqarnikuupput
Taamaammat ilisimatooq danskit inooqatigiinnut ilanngutivinnissamut politikkianit eqqugaasunik ujartuigaangat nunasiaataanerup assitalernera kukkusumik takusassiarineqarsinnaasarpoq, Ilisimatusarfimmilu adjunktiusimasoq naapertorlugu kalaallit tungaanniit tamanna aamma kissaataavoq.
- Nutarterineq kalaallit politikeriisa piffissami tassani namminneerlutik aallarniiniarnerannit aallaaveqarpoq, Jens Wendel-Hansen Nuummi ilisimatusarfimmut ukiorpassuanngortuni attuumassuteqarsimasoq oqarpoq.
AAMMA ATUARUK Nunasiaanermi pisunit eqqugaasimasut ilisimatusartup oqaluttuartikkusukkai
Sorsunnersuup aappaata kingorna Naalagaaffiit Peqatigiit nunasiaataajunnaarsaanissamik piumasaqaateqarput, tamanna nunatta danskit kunngeqarfianni 1953-imi amtinngorneranik kinguneqarpoq.
Nutarsaanerulli aqqani nunaqarfiit matuneqassasut danskisullu atuartitsineq pitsanngorsarneqassasoq sorsunnersuup siornatigut Landsrådiusimasut marluk siunnersuutigaat.
- Tamanna danskit naalakkersuisuisa politikkerisaanut akerliuvoq, tassa kalaallit immikkut ilisarnaatertik tigummiinnassagaat, tassalu nunaqarfinni najugaqarlutik piniartuullutillu kalaallisut oqaluinnassasut polikkerigaluarpaat.
Jens Wendel-Hansenip danskit naalagaaffiata nunattalu Landsrådiisa nutarsaaneranni amerlasuut naalliussimanissaat qularutiginngilaa.
AAMMA ATUARUK Forfatter: Danskerne ved for lidt om Grønland
Anne Kirstine Hermannilli piffissamut tamatumunnga tunngatillugu atuakkiaa, nunatta nunasiaataanerminngaanniit Danmarkimi amtinngorneranut tunngasoq amerlasuunit danskit kisiartaallutik kalaallit inuiaqatigiinneranni nutarsaanerannik paasineqassasoq ernummatigaa.
- Tamatumani eqqugaasimasut, danskit inooqatigiinnut ilanngutivinnissamut politikkiat oqaatsillu eqqartorneqaleraangata soorlu matumani eqqartorneqartut taava siusinnerusukkut qanoq inneranik takorluukkat uppernarsineqaannassapput, Jens Wendel-Hansen oqarpoq.
Jens Wendel-Hansenip nutarsaanermi eqqugaasutut misigisimasut kisimik tusaaginnarnagit nunaqarfimmiit nuunneq qanoq misigisimanarnersoq imaluunniit inuusuttut Danmarkimut danskisut ilinniariarnertik qanoq igineraat apeqqutigissallugu isumassaqarnerussasoraa.
- Amerlasuut eqqugaasimasutut misigisimasut ilisimavara. Allannguallaataanilli ersersitsisunik aamma ajunnginnerusumik isiginnittunik oqaluttuartunik tusarnikuuvunga, Jens Wendel-Hansen oqarpoq.