Kalaallit illuutaat: Kalaallit inuusuttut atugarliornerulersimasut
Atugarliornermi ulorianartorsiornermut attaveqatigiiffiat Samarbejdsforummimik taaneqartup, inuusuttunik inuuniarnermikkut atugarliortunik qanimut sullissisut, misissuineq ukioq 2017-imi maajip aallaqqaataani aallartippaat, ukioq mannalu maajip aallaqqaataani naammassillugu.
Inuusuttut nunatsinniit Danmarkimut nuukkaangamik ilaatigut inuuniarnikkut atugarissaarnerulernissaminnik siunertaqartarualuartut misissuinerup takutippaa. Inuuniarnikkullu ajornartorsiuteqareerlutik Danmarkimut tikikkaangamik tamanna amerlanertigut iluatsinngitsoortarpaat.
- Danmarkimut tikiinnaavillutik eqimattat inuuniarnikkut ajornartorsiutillit peqatigilertarpaat, taamaalisoqaraangallu ikioruminaassisarput. Atugarliortunik naapitsigaangamik inooqatigilersarpaat taakkunasulli inuulerlutik,
Misissuinermi ingerlatsisoq Mille Schiermacher, taama oqarpoq.
AAMMA ATUARUK Kalaallit Danmarkimi inuuniarnermikkut ajornartorsiortut sullinnissaat siuariartorpoq
Misissuinermi kalaallit 43-t peqataapput 18-it 30-llu akornanni ukiullit. Taakku Københavnimiinnerminni ilaatigut ajornarsiutit akuuffigisartagai misissuinermi ingerlatsisup ima oqaatigaa:
- Inuusunnerusut inuuniarnermikkut ajornartorsiornerulersimapput. Ilaatigut aanngajaarniutinik sakkortuunik atuinerulersimasut, nakuuserlutik saassussiumatunerulersimapput, qallunaatullu piginnaasaat appasinnerulersimapput. Taakkulu inunnik isumaginninnermik sullissisunit ikiuiniaraluartunit attavigineqarnissaat ajornakusoornerulersimavoq, Mille Schiermacher taama oqarpoq.
AAMMA ATUARUK Aarhusip kalaallit inuuniarnermikkut ajornartorsiuteqartut nunasisutulli pisinnaatitaaffeqartinniarai
Inuuniarnermikkut ajornartorsiuteqartut siumut ingerlariaqqinnissaanut pisortanit ikiorneqarniartaraluarput, tamannali ajornaatsuinnaanngilaq.
- Inissaqanngikkaanni isertitaqanngikkaanni, sumi sinissanerluni qanorlu nerissanerluni nalugaanni, ilinnialertoqarsinnaanngilaq sulilertoqarsinnaananilu, Mille Schiermacher KNR-imut taama oqarpoq.
Danmarkimi kalaallit inuuniarnermikkut ajornartorsiuteqartut pillugit misissuinerit oktobarip ulluisa aqqarnanni Odensemi ataatsimeersuarnermi saqqummiunneqassapput.
