Aarhusip kalaallit inuuniarnermikkut ajornartorsiuteqartut nunasisutulli pisinnaatitaaffeqartinniarai

SF-ip Aarhusip Kommuneniani illoqarfimmi qinikkanut aalajangiiffissatut siunnersuutaata ilaa taama oqaasertaqarpoq.

Kalaallit inuuniarnermikkut ajornartorsiuteqartut oqaatsit kulturillu assigiinnginneri peqqutaallutik danskit suliffeqarfiiniilerniarnermut ilungersuuteqartartut SFI-p nalunaarusiaata takutikkaa siunnersuummi allassimavoq.

Tamannalu aalajangiiffissatut siunnersuutip allanngortissavaa, kalaallinullu ikiorneqartariaqartunut tulluarsakkamik peqataasitsilernissamut pilersaarusiortoqarnissaa periarfissat ilagaat.

Kalaallit Danmarkimut maannakkut nuukkaangamit danskisut innuttaassuseqarnertik pillugu initaarnissamut, suliffittaarnissamut oqaatsinillu ilinniartinneqarfissamut assinganik periarfissinneqarneq ajorput, naak Danmarkimi Nunatsinnilu kulturikkut nunamullu ilisimasaqarnikkut assigiinngissuteqaraluartoq.

AAMMA ATUARUK Kalaallinut ikiortariaqartunut aningaasaliisoqarnera nuannaarutigineqartoq

Taamaammat nunamut qimaasunut nunasisunullu peqataasitsilernissamut pilersaarummi suut kalaallinut iluaqutaasinnaanersut misissorneqassasut siunnersuummi allassimavoq.

Kirkens Korshær, Kofoeds Skole Foreningen Grønlandske Børnilu suliaqarnermi peqataatinneqartassapput.

Siunnersuummi aamma allassimavoq, isummat pigiliutiinnakkat ammillu qalipaataa pillugu nikassaanerit kalaallit suliffittaarniarnerannut peqataanerulerniarnerannullu akornutaasut akiorniarlugit kalaallit ingerlalluartut erseqqinnerulersinniarneqassasut.

AAMMA ATUARUK Økonomisk støtte til socialt udsatte grønlændere