Kalaallit Danmarkimi inuuniarnermikkut ajornartorsiortut sullinnissaat siuariartorpoq
Danmarkimi isumaginninnermut siunnersortit peqatigiiffiata atuagassiaat Uden For Nummer taama allaaserisaqarput.
Aalborgip, Aarhusip, Esbjergip, Odensip aamma Københavnip kommunii suliniummut peqataapput, kalaallinullu kommunini taakkunani najugaqartunut ikiuinerup ajornannginnerulernissaa 2013-imili suliniummi anguniagavoq.
Kommunit, namminneq kajumissutsiminnik sulisut, peqatigiiffiillu namminersortut suleqatigiinnerulernissaat, suliniummi anguniakkanut ilaapput.
Allaaserisarlu naapertorlugu taama suleqatigiinneq tamaat isigalugu naammagineqarpoq.
AAMMA ATUARUK Aarhusip kalaallit inuuniarnermikkut ajornartorsiuteqartut nunasisutulli pisinnaatitaaffeqartinniarai
Suliniut kalaallinik sullissinermut siuariaataasoq peqataasut ataatsimut isigalugu isumaqatigiissutigaat.
Suliniulli iluaqutaagaluartoq, suliniutip ukiup naanerani naggaserneqarnerata kingorna, suleqatigiinneq qanoq ingerlateqqinneqassanersoq kommunit peqatigiiffiillu ernumartikkaat allaaserineqarportaaq.
Peqatigiiffinniit neriuutigineqarpoq taama suleqatigiittarneq inatsisitigut aalajangersarneqassasoq, kommuninimi suliassarpassuit akornanni puigorneqaannannginnissaa neriuutigineqarami.
Taama suleqatigeriaaseqarneq kommunini allani atuutilernissaat neriuutaavoq.
AAMMA ATUARUK Ikiuisussanik nutaanik pilersitsinikkut kalaallit inooqataanikkut ajornartorsiortut ikiorserniaraat