Ikiuisussanik nutaanik pilersitsinikkut kalaallit inooqataanikkut ajornartorsiortut ikiorserniaraat
Kalaallit Danmarkimi angerlarsimaffeqanngitsutut inuusut imaluunniit kommunimi najugarisaminni isumaginnittoqarfimmut atassuteqaratik atornerluisuullutik atugarliorlutillu inuusut amerlavallaarput.
Taamaammat partiit 2017-imut satspuljemit aningaasaliissutissanik isumaqatigiissuteqartut kalaallit Danmarkimi inooqataanikkut ajornartorsiortut ikiorserneqarnissaannut ukiuni tulliuttuni sisamani 46,4 millionit koruuninik aningaasaliissuteqarput.
Danskillu isumaginninnermut ministeriat Karen Ellemann naapertorlugu taamatut suliniuteqarnissaq pisariaqartinneqarpoq.
- Kalaallit Danmarkimi taama amerlatigisut atornerluisuullutik, angerlarsimaffeqanngitsuullutik inuiaqatigiinnullu atassuteqaratik inuullutik atugarliulersarnerat akuerineqarsinnaanngilaq, ministeri oqarpoq.
Aamma atuaruk Kalaallit ikiortariaqartunut aningaasaliineq nuannaarutigineqartoq
Aningaasaliissutinit 46,4 millionit koruuniusunut 10 millionit Nunatsinni atorneqassapput, Namminersorlutik Oqartussat meeqqat inuusuttullu pillugit suliniuteqarnerinut atorneqassallutik.
Sinneruttullu 36,4 millionit koruunit affaat suliniummut nutaamut immikkoortinneqarsimapput, tassalu kalaallinut inooqataanikkut ajornartorsiortunut ikiuisussanut immikkut ittunut atorneqassallutik.
Ikiuisussat tassaassapput kommunimi atorfillit kalaallit kulturiannik immikkut ilisimasallit aammalu ilaatigut kalaallisut oqalussinnaasut.
Aamma nammineq kajumissutsimik suleqataasoqassaaq, taakkulu kommunip sullissineranut atanatik kalaallinut ornigullutik tapersersuisuussapput.
- Isumaqarpunga kommunini sullissisut namminnerlu kajumissutsiminnik suleqataasut suleqatigiissinnerisigut angusaqarluarsinnaassalluta. Taamaaliornikkummi isumaginninnikkut neqeroorutaasut ullumikkut pissarsiffigineqarpallaartanngitsut pissarsiffigineqarnerulersinnaassasoraakka, danskit isumaginninnermut ministeriat taama oqarpoq.
Aamma atuaruk Kalaallit inuuniarnermikkut ajornartorsiuteqartut aningaasaliiffigineqalersut
Aalborgimi Kalaallit Illuutaanni pisortap Søren Stach Nielsenip satspuljemit aningaasaliissutaasunik pingaarnersiuineq isumaqataaffiginngilaa.
- Aningaasaliissutaasut amerlineqarneri qujaruppagut, aningaasalli ilarpassui ikiuisussanut immikkut ittunut immikkoortinneqarsimanerat pakatsissutigaara, taakkumi kommunini suliniaqatigiiffinnilu arlalinni pigineqareermata, pisortaq oqarpoq.
- Apeqqut: Aningaasammi sumut atorneqassagaluaramik?
- Kalaallit Nunaannit nussortut amerliartuinnarput, taakkulu amerlanertigut ikiortariaasarput. Taamaammat kalaalit inooqataanikkut ajornartorsiortut nussornerisa unitsinnissaa samminerusariaqarparput.
Kalaallit Danmarkimi inooqataanikkut ajornartorsiortut amerlassusaat erseqqissumik naatsorsorneqarsimanngilaq.
Sullissiviilli arlallit natsorsuutigaat inuit 1000-it 1500-llu akornanniissasut.
/ritzau/