Assi: Hordaland fylkeskommune/Flickr

Kalaallit ilinniartut danskisut pikkorissarnissaannut danskit naalakkersuisui periarfissiiniartut

Danskit naalakkersuisuisa kalaallit ilinniartut danskisut immikkut ilinniartinneqarnissaannut 20 millionit koruunit atorniarpaat. Siunnersuut kalaallinit folketingimi ilaasortanit assigiinngitsunik isumaqarfigineqarpoq.

Kalaallit Danmarkimi ilinniartut 2019 aallarnerfigalugu Kalaallit Illuutaasa suleqatiginerisigut danskisut oqaatsinik atuinissamut danskillu ilinniarnerannut kulturimut tunngasunik immikkut ittumik aasaanerani atuarnissaminnut periarfissaqalissapput.

Danskit naalakkersuisuisa 2019-imit 2021-mut aningaasanut inatsisip isumaqatigiinniutigineranut atatillugu tamanna siunnersuutigigaat, folketingimut ilaasortap, Aleqa Hammondip (NQ) aningaasanut ministeri Kristian Jensen ataatsimeeqatigereerlugu ilisimatitsissutigaa.

AAMMA ATUARUK Oqaatsinut immikkoortitsisoqarnera nersualaaraa

Aleqa Hammondip oqarnera naapertorlugu 8 millionit koruunit aasaanerani pikkorissaanissamut aamma 12 millionit koruunit kalaallinut inuusuttut ilinniarfiini ilinniarfinniluunniit ingerlariaqqiffiusuni ilinniartunut danskisut pikkorissaanissaannut ukiuni sisamani immikkoortinneqarput.

Aningaasaqarnermulli ministerip kisitsisit uppernarsarnianngikkallarpai.

Kalaallit folketingimut ilaasortaat assigiinngitsunik isumaqartut

Aleqa Hammondip danskit naalakkersuisuisa siunnersuutaat nersualaarpaa.

- Qallunaat oqaasii unamminartuusinnaapput. Pingaartumik qallunaat peqatigalugit taamatut qaffasitsigisumik oqalussinnaanissaq amerlasuutigut uparuaatigineqartarpoq artornarnerartarlugu. Imaluunniit Danmarkimut aatsaat tikilluni efterskolernialeraanni. Taamaattumik tamanna oqariartuutigisarsimasarput tusaaneqarsimavoq.

Kalaallit Danmarkimi ilinniarfinni ingerlariaqqiffiusuni ilinniartut sisamararterutaat ilinniarnerup ukiuani siullermi ullumikkut taamaatitsiinnartarput.

Inuit Ataqatigiit Folketingimut ilaasortaata, Aaja Chemnitz Larsenip siunnersuut assigiinngitsunik isumaqarfigaa. Danskit naalakkersuisuisa kalaallit Danmarkimi ilinniagaqartut amerlanerusut naammassisalernissaannut ikiuukkusunnerat nuannaarutigaa.

AAMMA ATUARUK Kalaallit danskit oqaasiinik ilinniartinneqartarnerinut 2,5 mio. kr.-nit immikkoortinneqartut

Siunnersuulli Inuit Ataqatigiinnit siunnersuutaanngitsoq, Aaja Chemnitz Larsenip erseqqissaatigaa. Taassuma ukiuni sisamani 20 millionit koruunit amerlasoorujussuusorai taamaammallu susassaqarfiit sorliit danskit aningaasanut inatsisaannit ukiup tulliani aningaasassaqassannginnerat ernumanartoqartippaa.

- Isumaqarpunga una paasissallugu pingaartuusoq;20 millionit koruunit amerlasoorujussuusorisakka pingaarnersioraanni, taava suliniutit suut pingaarnersiorneqassanngillat? Aaja Chemnitz Larsen oqarpoq.

AAMMA ATUARUK Kalaallit danskit oqaasiinik akeqanngitsumik ilinniarnissaminnut suli periarfissaqarput

Taassuma Naalakkersuisut Inatsisartullu nunatsinni meeqqat atuarfiini danskisut ilinniartitsinermik oqallisiginninnerulernissaat kissaatigaa.

- Qanoq nammineq iliuuseqarsinnaatigaagut? Aasaanerani pikkorissarnerit ajunngitsorujussuupput. Tamannali (danskisulli aqq.) aallaqqaammulli ajornartingaatsiarneqarsimappat taava nunatsinni meeqqat atuarfiini ilinniartitsineq sammigaanni pitsaanerussaaq, Aaja Chemnitz Larsen oqarpoq.

AAMMA ATUARUK Naalakkersuisooqatigiit tuluit oqaasii pillugit pilersaarutaat Venstremit isorineqartut

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat