Aaja: Oqaatsinut immikkoortitsisoqarnera nersualaaraa
Danskit oqaasiinik ilinniarnermut nammineq akiliuteqarnissamik siunnersuutigineqartup isornartorsiorneqarnerata kingorna, danskit naalakkersuisui 2,5 millionit koruuninik immikkoortitsipput. Inatsisissatut siunnersuummi siunnersuutigineqarpoq allamiut danskisullu innuttaassuseqartut Danmarkimi oqaatsinik pikkorissarfinni danskit oqaasiinik ilinniarnerminnut nammineerlutik akiliuteqartassasut.
AAMMA ATUARUK Kalaallit danskit oqaasiinik ilinniartinneqartarnerinut 2,5 mio. kr.-nit immikkoortinneqartut
Inuit Ataqatigiinneersup Aaja Chemnitz Larsenip iliuuserineqartoq Folketingimi tamakkiisumik taperserneqartoq nersualaarpaa.
Taanna isumaqarpoq kalaallit savalimmiormiullu inatsisissatut siunnersuut aqqutigalugu nunani allamiunut naligiissinniarneqarsimasut.
- Kalaallit danskit oqaasiinik ilinniarnissamut periarfissaannik ajornerulersitsinnginnissaa uannut pingaartuuvoq, nalunngilarpummi pisariaqartitsineq annertuupilussuusoq, Aaja Chemnitz Larsen oqarpoq.
Danskilli naalakkersuisuisa erseqqissaatigisimavaat - inatsimmik allanngortitsisoqaraluarpalluunniit - ilaatigut aftenskolit aamma Inersimasunut Piareersaataasumik Ilinniartitaaneq, kommuninit akilerneqartartut, aqqutigalugit kalaallit danskit oqaasiinik ilinniarnissamut akeqanngitsumik suli periarfissaqassasut.
AAMMA ATUARUK Kalaallit danskit oqaasiinik akeqanngitsumik ilinniarnissaminnut suli periarfissaqarput
Tamannali naammanngitsoq, Aaja Chemnitz Larsen oqarpoq.
- Kalaallit danskit oqaasiinik ilinniarnissamut pisariaqartitsinerat annertunerutillugu - aamma tamanna oqaluttuarisaanermi pisarsimasunik pissuteqartoq ilisimareerparput, tassalu nunatsinni kalaallit oqaasiinik salliutitsisoqarsimammat, tamannalu maanga Danmarkimut nuunnermi kingunerlutsitsisarpoq. Taamaammat kalaallit Danmarkimiittut danskit oqaasiinik ilinniarnissamut periarfissaat pitsaanerupput, aammali pisariaqartitsineq annertuneruvoq, Aaja Chemnitz Larsen oqarpoq.
Aningaasat agguagassat 2018-imit 2020-mut immikkoortinneqarput Namminersorlutillu Oqartussat suleqatigalugit aqunneqassallutik. Aaqqissuussinerlu 2020 nallertinnagu nalilersorneqassasoq, Inger Støjberg Folketingip Allamiunut Akuulersitsiniarnermullu ataatsimiititaliaanut allakkamini taama allappoq.
AAMMA ATUARUK Danskit oqaasiinik ilinninernermut akiliisarnissaq akerlerineqaqisoq
AAMMA ATUARUK Kalaallit akeqanngitsumik danskisut ilinniarsinnaanerat peerniaraat
