Kalaallit akeqanngitsumik danskisut ilinniarsinnaanerat peerniaraat

Danmarkimi naalakkersuisut kalaallit akeqanngitsumik danskisut ilinniarnerannik taamaatitsiniarnerat Inuuniarnermikkut Ajornartorsiutillit pillugit Siunnersuisoqatigiit paasiuminaatsippaat. Siunnersuut kalaallit Danmarkimi najugallit inuiaqatigiinni immikkoornerulersinneqarnerannik kinguneqarsinnaasoq siunnersuisoqatigiit ernummatigaat.
Assi © : KNR/Simon Uldum
Allattoq Ivik Kristiansen
apriilip 30-at 2018 06:58

Nunanit allaneersut ilaallu ilanngullugit danskisut ilinniarnermut immikkoortukkuutaanut arfinilinnut 12.000 koruuninik akiliisarnissaat Danmarkimi naalakkersuisut siunnersuutigaat. Kalaallit savalimmiormiullu atuisut akiliisarnissaannut inatsisissatut siunnersuummi ilaatinneqarput.

Inuuniarnermikkut Ajornartorsiutillit pillugit Siunnersuisoqatigiit siulittaasuat, Jann Sjursen ima oqarpoq.

- Sooq naalakkersuisut akeqanngitsumik danskisut ilinniarneq kalaallinut, aammalumi savalimmiormiunut, taamaatinniarneraat paasiuminaattorujussuuvoq. Oqaatsitigut akimmiffeqarneq kalaallinut, danskisut innuttaassuseqartunut, Danamarkimukartunut inuiaqatigiinni immikkoornerulernernissamik aarlerinarnerutitsileqartoq siunnersuisoqatigiit misissuinerannit arlalinnit nalunngilarput.

Atuisut danskisut ilinniarnermut akiliisalernissaannut danskit naalakkersuisuisa siunnersuutaat Inuuniarnermikkut Ajornartorsiutillit pillugit Siunnersuisoqatigiinnit akerlerineqartoq Jann Sjursenip erseqqissaatigaa.

- Naalakkersuisut siunnersuutertik, inuit danskisut ilinniarnissamut akissaqanngitsunut immikkoornerulersitsisussaq, tunuartittariaqaraat Inuuniarnermikkut Ajornartorsiutillit pillugit Siunnersuisoqatigiit isumaqarput, Jann Sjursen oqarpoq.

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk