Kalaallit danskit oqaasiinik ilinniartinneqartarnerinut 2,5 mio. kr.-nit immikkoortinneqartut

Danskit oqaasiinik ilinniarnermut nammineq akiliuteqarnissamik siunnersuutigineqartup isornartorsiorneqarnerata kingorna, danskit naalakkersuisui Danmarkimi kalaallit inooqataanikkut ajornartorsiuteqartut danskit oqaasiinik ilinniartinneqartarnerinut 2,5 millionit koruuninik immikkoortitsipput.

Danmarkimi danskit oqaasiinik ilinniarnermut modulimut ataatsimut nammineq 2000 koruuninik akiliuteqartoqartarnissaanik danskit naalakkersuisuisa ungasinngitsukkut siunnersuutigisaat arlalinnit isornartorsiorneqarpoq.

AAMMA ATUARUK Danskisut ilinniarsinnaanermut akiliisalertoqassappat kalaallinut eqquinerlussinnaavoq

Siunnersuummi pineqartumi danskisut innuttaassuseqartut aamma pineqarput, kalaallit savalimmiormiullu Danmarkimi najugaqartut danskillu oqaasiinik pikkorissarnissaminnut pisariaqartitsisut ilanngullugit.

Folketingimili Inuit Ataqatigiinnit Nunatta Qitornaaniillu sakkortuumik isornartorsiuisoqareersoq, danskit naalakkersuisui Ilinniartitaanermut ministereqarfiup ataani 2,5 millionit koruuninik immikkoortitsiniarlutik aalajangerput, aningaasallu taakku Danmarkimi kalaallinut inooqataanikkut ajornartorsiortut danskit oqaasiinik ilinniartinneqartarnerinut kommuninit qinnuteqaateqarfigineqarsinnaapput.

AAMMA ATUARUK Kalaallit danskit oqaasiinik akeqanngitsumik ilinniarnissaminnut suli periarfissaqarput

Allamiunut akuulersitsiniarnermullu ministeri Inger Støjberg Folketingip Allamiunut akuulersitsiniarnermullu ataatsimiititaliaanut taama allappoq.

Aajap iliuuserineqartoq nersualaarpaa

Inuit Ataqatigiinneersup Aaja Chemnitz Larsenip iliuuserineqartoq Folketingimi tamakkiisumik taperserneqartoq nersualaarpaa. Taanna isumaqarpoq kalaallit savalimmiormiullu inatsisissatut siunnersuut aqqutigalugu nunani allamiunut naligiissinniarneqarsimasut.

- Kalaallit danskit oqaasiinik ilinniarnissamut periarfissaannik ajornerulersitsinnginnissaa (inatsisissatut siunnersuutip, aaqq.) uannut pingaartuuvoq, nalunngilarpummi pisariaqartitsineq annertuupilussuusoq, Aaja Chemnitz Larsen oqarpoq.

Danskilli naalakkersuisuisa erseqqissaatigisimavaat - inatsimmik allanngortitsisoqaraluarpalluunniit - ilaatigut aftenskolit aamma Inersimasunut Piareersaataasumik Ilinniartitaaneq, kommuninit akilerneqartartut, aqqutigalugit kalaallit danskit oqaasiinik ilinniarnissamut akeqanngitsumik suli periarfissaqassasut.

Tamannali naammanngitsoq, Aaja Chemnitz Larsen oqarpoq.

AAMMA ATUARUK Siunnersuisoqatigiit siunnersuummut isornartorsiuinertik attatiinnaraat

- Kalaallit danskit oqaasiinik ilinniarnissamut pisariaqartitsinerat annertunerutillugu - aamma tamanna oqaluttuarisaanermi pisarsimasunik pissuteqartoq ilisimareerparput, tassalu nunatsinni kalaallit oqaasiinik salliutitsisoqarsimammat, tamannalu maanga (Danmarkimut, aaqq.) nuunnermi kingunerlutsitsisarpoq. Taamaammat danskit oqaasiinik ilinniarnissamut periarfissaat (kalaallit Danmarkimiittut, aaqq.) pitsaanerupput, aammali pisariaqartitsineq annertuneruvoq, Aaja Chemnitz Larsen oqarpoq.

Aningaasat agguagassat 2018-imit 2020-mut immikkoortinneqarput Namminersorlutillu Oqartussat suleqatigalugit aqunneqassallutik. Aaqqissuussinerlu 2020 nallertinnagu nalilersorneqassasoq, Inger Støjberg Folketingip Allamiunut Akuulersitsiniarnermullu ataatsimiititaliaanut allakkamini taama allappoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat