Aaja: Danskisut ilinniarsinnaanermut akiliisalertoqassappat kalaallinut eqquinerlussinnaavoq

- Kalaallit, danskisut innuttaassusillit, Danmarkimi periarfissaannik innarliisumik inatsisissatut siunnersuusiortoqarnera paasiuminaatseqaara, Aaja Chemnitz Larsen, tusagassiutinut nalunaarummi ilaatigut allaaserisaqarpoq

Nunanit allaneersut Danmarkimi ilinniartut, kalaallillu savalimmiormiullu ilanngullugit, 18-ileereersimasut, danskit oqaasiinik ilinniarniartut akiliisalernissaat siunnersuutigineqarpoq.

Taamaaliornissaq kommuninit ullumi aningaasalersorneqarput.

Nunanit allaneersut danskisut ilinniarfinnut akiliuteqartalernissaat pillugu siunnersuut tusarniaassutigineqarmat siunnersuut isornartorsiorneqarpoq, nunanit allaneersut Danmarkimi inuiaqatigiinnut akuunerulernissaannut innarliisoq ilaatigut oqaatigineqarluni.

AAMMA ATUARUK Danskisut ilinniarnissamut akiliuteqartitsiniarneq unitsilli

Kalaallit nunanit allaneersut naligalugit danskisut Danmarkimi ilinniarsinnaanissaat, Kalaallit Danmarkimi illuutaasa, peqatigiiffillu Foreningen Grønlandske Børnip siorniatigut suliniutigisimavaat, politikkikkullu tamanna nunatsinnit aamma tapersersorneqarluni.

Danskisut ilinniarnermut nammineq akiliisoqartalissappat, kalaallit Danmarkimi akuunerulersinneqarnissaannut innarliisinnaasoq Aaja Chemnitz Larsenip oqaatigaa:

- Atorsinnaanngilaq. Kalaaliulluni Danmarkimi inuuneq artornarnerujartulersinnaassaaq. Pingaartumik kalaallit danskisut ilinniartariaqartut eqqarsaatigalugit, taakku suliffeqalersinnaanissaannut periarfissat eqqarsaatigalugit, Folketingimut ilaasortaq oqarpoq.

AAMMA ATUARUK Aarhusip kalaallit inuuniarnermikkut ajornartorsiuteqartut nunasisutulli pisinnaatitaaffeqartinniarai