Danskisut ilinniarneq: Siunnersuisoqatigiit siunnersuummut isornartorsiuinertik attatiinnaraat
Danskisut innuttaassuseqartut, matumani kalaallit savalimmiormiullu ilanngullugit, danskit oqaasiinik akeqanngitsumik siunissami ilinniarsinnaajunnaarsinniarneqarnerat taarsiullugulu inersimasut ilinniarfiinut (FVU-mut) sulisinnaalernissamulluunniit neqerooruteqartitsinissamut kommuni aqqutigalugu danskisut akeqanngitsumik ilinniarnissamut qinnuteqartalernissaat naammaginanngilaq.
Inuuniarnermikkut ajornartorsiuteqartut pillugit siunnersuisoqatigiit tamanna aalajangiusimavaat. Imminut pilersortut Danmarkimi danskit oqaasiinik ilinniarfinni pikkorissartarnerannut akeqalertitsiniarlutik, danskit naalakkersuisuisa siunnersuutaannut akerliusunut taakkua ilaapput.
AAMMA ATUARUK Kalaallit danskit oqaasiinik akeqanngitsumik ilinniarnissaminnut suli periarfissaqarput
- Oqaatsinik pikkorissarnissamut innuttaasutut pisariaqartitsineq malillugu periarfissat ajornerulissapput, Robert Olsen siunnersuisoqatigiinni ilaasortaq, Kofoed Skolemilu forstanderi oqarpoq.
Pitsaassusaanut tunngasut oqaaseqarfiginngikkaat
Danmarkimi danskit oqaasiinik ilinniarfinni atuisut akiliuteqartalernissaannut siunnersuut Folketingimi marlunngormat siullermeerneqarmat isummat ersarissisinneqarput.
Nunanut allamiunut akuulersitsiniarnermullu ministerip, Inger Støjbergip (V) danskisut innuttaassuseqartut danskisut oqaatsinik ilinniarfinni, soorlu FVU-ni akeqanngitsumik ilinniaannarsinnaanerat erseqqissaatigaa.
Inuuniarnermikkulli ajornartorsiuteqartut pillugit siunnersuisoqatigiit qinigassat allat pitsaassusaat oqaaseqarfigerusunngilaat.
AAMMA ATUARUK Danskisut ilinniarsinnaanermut akiliisalertoqassappat kalaallinut eqquinerlussinnaavoq
- Naamik, qinigassat arlaat aappaanit pitsaanerunersoq siunnersuisoqatigiinni isummerfiginngilarput. Oqartoqarsinnaavoq ilinniartitsinermi assigiinngissuteqartoq – tamarmik assigiinngillat. Oqaatigissalluguli pingaaruteqarpoq imarisaat isummerfiginnginnatsigit, Robert Olsen KNR-imut oqarpoq.
Danskit naalakkersuisui kalaallinik savalimmiormiunillu nunami allamiunut naleqqiussisut Nunatta Qitornaasa Inuit Ataqatigiillu Folketingimi oqallinnermi uparuarpaat.
- Nammineq naalagaaffimmi innuttaasorisamut qanoq iliuuseqarnermut tunngavoq. Una ajornerulersitsineruvoq, Aleqa Hammond (NQ) oqarpoq.
AAMMA ATUARUK Danskit oqaasiinik ilinninernermut akiliisarnissaq akerlerineqaqisoq
Tamannali Støjbergip itigartitsissutigaa siunnersuullu danskinut innuttaasunut assersuutigalugu piffissami sivisuumi nunani allamiissimasunut danskisullu piginnaasaminnik pikkorissarusuttunut ilaatigut aamma atuunnera innersuussutigalugu.
- Ataqqinnittumik... Allaanngilaq akerleriissuteqarnermik piunngitsumik arlaannilluunniit aallartitsiniarneruinnartoq, ministeri oqaluttarfimmit oqarpoq.
