Kalaallit ilinniagaqartut peqatigiiffiat Aarhusimiittoq unikkallassagunartoq
Sapaatip akunnerani kingullermi ukiumoortumik ataatsimeersuarnermi, inuit tallimaannaat takkupput. Takkunannga pingasut siulersuisunit tunuartussaapput.
Avalak Aarhus taamaasilluni siulersuisussanik nutaanik pilersitsisinnaasimanngilaq, siulersuisuni ilaasortat ikinnerpaamik, ukiumi tullermi, tallimaasussaammata. Peqatigiiffiup immikkoortortaa taamaasilluni matuneqarnissamut ulorianartorsiorpoq.
AAMMA ATUARUK Kalaallit Illuutaat kommunimut qinersineq pillugu oqallitsitsinngitsut
Ilinniartooqatinut kaammattuut
- Avalak Aarhus ullumikkut 50-ingajannik ilaasortaqarpoq. Kalaallit ilinniartut maani Danmarkimi illoqarfiit annersaasa tulliani ikigisassaanngillat, siulittaasuugallartoq taama isumaqarpoq.
Peqatigiiffik sammisaqartitsigaangat takkuttartut amerlassusii ajorisassaanngillat – tassami Kalaallit Illuutaanni Aarhusimi sammisaqartitsisoqaraangat ilinniartut takkuttartut ikigisassaanngillat.
Taamaammat siuttaasuugallartup tupigusuutigaa siulersuisunut ilaasortanngorlutik, aqutsinissamik akisussaaffimmillu tiguserussinnaasut, taama ikitsigimmata.
AAMMA ATUARUK Fortsat kritik fra Avalak
Ilaasortarpassuaqaraluartugut peqatigiiffimmi siulersuisutut sulinissamut soqutiginnittoqarpasinngilaq, Avalak Aarhusimi siulittaasuugallartoq Mia H. Chemnitz taama oqarpoq.
Siulersuisut maanna atuuttut neriuutigivaat, siulersuisuni sulinissamut kajumittoqalerumaartoq, immikkut ataatsimeersuartitsinissami, immikkullu kaammattuisoqareerneratigut.
Soorunami neriuutigaarput pissutsit atuuttut saqqummiutereerutsigit, ilaasortanullu kaammattuinerput apuutereerutsigu taamatullu ajornartorsiuteqarluta nalunaarutigereerutsigu, ilaasortat takkukkumaartut siulersuisunilu sulinissamut peqataalerumaartut, Mia H. Chemnitz taamat oqarpoq.
Avalak suli pisariaqartinneqarpoq
Kalaallit ilinniartut peqatigiffia Kalaallit Illuutaani Aarhusimiittumi siulersuisuini ilaasortaatitaqarpoq, Inuusuttunullu Jyllandip Qeqqaniittunut sammisaqartitsitsinernut annertuunut aaqqissuusseqataasarlutik, tassungalu tunngatillugu Aarhusimi suliffissanik ukiumoortumik nittarsaassinermut aamma ilaasarput.
Avalaap politikkikkut akuusarnissaa suli aamma pisariaqartoq, Mia H. Chemnitz oqarpoq, ilinniartitaanermut tunngasunik inuiaqatigiinnilu pissutsinut oqalliseqataanissaq, ataatsimiinnernullu ilaasarnissaq pisariaqarpoq, ilaatigut Avalaap nunap tamakkerlugu Siulersuisuunerinut.
AAMMA ATUARUK Kajumissutsiminnik suleqataasussaaleqineq ikiuisussanut ajornartorsiutaasinnaasoq
Sooq ilinniartoqatini siulersuisuni sulinissamut ilaarusunnginnersut Mia H. Chemnitzip imaaliallaannaq tikkuarsinnaanngilaa. Isumaqarporli Avalak pitsaanerusumik suliaminik paasissutissiisinnaasoq.
Neriuppunga siulersuisut suliaanik erseqqissaagutta, amerlanernik kajumilersitsisinnaassalluta.
Immikkut ataatsimeersuarnermi siulersuisunik pilersitsisisoqarsinnaanngippat, peqatigiffik ukiup affaa unikkallassaaq, taassumalu kingorna ataatsimiinnissamut nutaamut qaaqqusisoqassaaq.
