Avalak isornartorsiueqqittoq
![](/sites/default/files/styles/image_934x467/public/article_images/avalak_skilt_foto_simon_uldum.jpg?itok=-6FOtKcK)
Ilinniakkanik killiliinissaq juulli sioqqullugu akuersissutigineqarpoq, taamaaliortoqarneratigullu Danmarkimi ilinniagaqartut, kalaallit ilinniagaqartut ilanngullugit, ilinniakkanik assigiimmik qaffasissusilinnik ilinniagaqarsinnaajunnaarsinneqarput, aamma ilinniakkamit siullermit appasinnerusumik ilinniagaqarnissaq periarfissaajunnaarpoq.
Annertuumilli isornartorsiuisoqareersoq ilinniakkap siulliup naammassineranit ukiut arfinillit ingerlareersimatillugit ingerlaqqiffiusumik ilinniagaqartoqarsinnaanera Folketingimi amerlanerussuteqartut sapaatit-akunnerata siuliani akuersissutigaat.
Allannguutillu pitsannguutaagaluarlutik naammanngitsut, kalaallit Danmarkimi ilinniagaqartut peqatigiiffianni Avalammi siulittaasoq, Marie Kahlig, nittartakkamut Sermitsiaq.AG-mut taama oqarpoq.
- Kalaallit ilinniagaqartut ilinniakkanik killiliinermut, ilinniarnissamut periarfissanik ukiunik arfinilinnik kinguarsaataasussamut, qanoq ilaatinneqarnissaat aamma isumakuluutigaarput.
Ukiut ikinnerpaamik arfinillit utaqqeqqaartoqartassappat, inatsisip Nunatsinni ilaquttat qimallugit Danmarkimut ilinniariartoqqinnissamik kajungernarunnaarsitsinissaa aamma ernumassutigaa.