Ilinniakkat killilernissaannik inatsit danskit partiivisa allanngortikkaat
Ilinniakkat killilernissaannik inatsisip sakkukillinissaa Folketingimi amerlanerussuteqartut isumaqatigiissutigaat. TV2 taama allaaserisaqarpoq.
Inatsit decembarip qaammataani akuersissutigineqarpoq, Danmarkimilu ilinniakkanik assigiimmik qaffasissusilinnik marlunnik arlalinnilluunniit, imaluunniit ilinniakkamit siullermit appasinnerusumik ilinniagaqarnissaq inatsimmi killiliiffigineqarluni.
AAMMA ATUARUK Danmarkimi ilinniakkanik killiliisalernissaq kalaallinut ilinniartunut eqquissaaq
Isumaqatigiissutigineqartorli nutaaq naapertorlugu, ilinniakkamik ilinniagareriikkap qaffaseqataanik imaluunniit appasinnerumik aallartitsinissaq periarfissaalerpoq, ilinniakkap siulliup naammassineranit ukiut ikinnerpaamik arfinillit ingerlareersimanissaat piumasaaqaalluni.
Ilinniakkanik killiliisoqarnera akerleralugu Danmarkimi ilinniagaqartut kattuffii akerliussutsiminnik takutitsipput, killiliinerlu partiinit isumaqatigiissummut ilaanngitsunit isornartorsiorneqarluni.
Partiit isumaqatigiissuteqartut - danskit naalakkersuisui, Dansk Folkeparti aamma Socialdemokraatit, isumaqatigiissut nutaaq pillugu, Danmarkimi nalunaaqutaq malillugu ullaap tungaani, tusagassiortunik katersortitsipput, TV2 taama ilisimatitsivoq.
