Kalaallit Illuutaat kommunimut qinersineq pillugu oqallitsitsinngitsut

Kalaallit Illuutaat Danmarkimiittut kommunimut qinersinissaq pillugu aaqqissuussisimanngillat. Innuttaasut nunatta avataaniittut 31-nnaat allakkatigut qinersinerisa kingorna tamanna uggornartuusoq kalaallit illuini pisortat nassuerutigaat.
apriilip 05-at 2017 11:46
Nutserisoq Simon Uldum -

Kommunimut marlunngornermi qinersinermut atatillugu Aarhusimi, Københavnimi Odensemilu Kalaallit Illuutaanni oqallitsitsisoqaranilu allanik aaqqissuussisoqarsimanngilaq.

Kalaallit Danmarkimiittut ikinnerpaamik 700-t qinersisinnaatitaagaluarput. 

Aaqqissuussisoqarsimannginneranut suliassat pingaarnerit allat ulapputigineqarnerat pissutaasoq, Aarhusimi Kalaallit Illuutaanni pisortap, Jørn Holbechip, KNR-imut oqaatigaa.

- Apeqqut taanna akiuminaappoq. Suliassarput pingaarneq tassaavoq aallartitatut sulineq Kalaallit Nunaannullu attaviliinissaq, taamaammat apeqqutit innuttaasunut Kalaallit Nunaanneersunut imaluunniit Kalaallit Nunaanni najugaqartunut attuumassutillit sammisarpagut. Kommunimulli qinersinissap immikkut samminissaanut piffissaq akunnassimavoq.

Aalborgimi Kalaallit Illutaannit, KNR-ip saaffiginnissutaanut kisiartaalluni akissuteqartumit, taama oqaatigineqarpoq.

 

Pisortat: Ataqatigiissaarinissaq amigaataasimavoq

Kommunimulli qinersineq pisarnertut pivoq, 2013-imit ukiut sisamat qaangiuttut. Taamaammat Kalaallit Illuutaasa arajutsisinnaanngikkaluaraat, Jørn Holbechip nassuerutigaa.

Qineqqusaarnerulli sammineqarnera tunngaviatigut Nunatsinnit ingerlanneqartussatut ilimagisimagaluarpaa.

- Tamanna eqqarsaatiginngivipparput. Kommunimummi qinersineq Kalaallit Nunaanni ingerlanneqarpoq. Taamaammat qularutissaanngilaq kalaallit nunap avataaniittut qinersitikkusukkaanni, taava tamatuma anguniarneqarnissaa Kalaallit Nunaannit qulakkeerniarneqartariartoq, Jørn Holbech taama oqarpoq.

Allakkatigut taasisinnaatitaanerup periarfissaaneranik Kommuneqarfik Sermersuup kisiartaalluni tusagassiorfinnut nalunaaruteqarluni eqqaasitsissuteqarsimanera innersuussutigaa. Kalaallit Illuutaalli Nunatta Københavnimi Sinniisoqarfianit tusagaqarsimanngillat.

Sinniisoqarfimmit oqaatigineqarpoq allakkatigut taasinissamut malittarisassat pillugit paasissutissat Pinerluttunik Isumaginnittoqarfimmut, Rigshospitalimut, Kalaallit Peqqissartut Illuannut ilinniartullu peqatigiiffiannut Avalammut nassiunneqarsimasut, Kalaallit Illuutaalli nassinneqarsimanngitsut. Avalakkoortumik tamanna pissasoq sinniisoqarfiup naatsorsuutigisimanerarpaa.

 

lliuuseqarnerusinnaasimagaluartut

Sammineqalaarsimavorli. Københavnimi Odensemilu Kalaallit Illuutaanni quppersakkat pissarsiarineqarsinnaasimapput, aamma pingaartumik kalaallit Danmarkimi ilinniagaqartut allakkatigut taasisinnaanerat nivinngaavinni nutaarsiassanilu paasissutissiissutigineqarsimavoq. Aamma Avalak paasissutissanik tunniussaqarsimavoq.

Odensemiillu kalaallit Region Syddanmarkimi ilinniagaqartut tamaasa qinersinissaq pillugu mailikkut allaffigineqarsimapput. Kommunimut qinersineq pillugu aaqqissuussisarneq Kalaallit Illuutaasa ileqqorinngikkaat pisortaasut ilisimatitsissutigaat - tamanna taamaallaat pisarpoq Inatsisartunut qinersisoqartillugu.

Danmarkimiilli nunanillu allanit 31-iinnaat allakkatigut taasinerisigut sammineqarnera naammassimanngitsoq Københavnimi Kalaallit Illuutaanni pisortap Leise Johnsenip oqaatigaa.

- Qinersineq Kalaallit Nunaanni ingerlanneqarpoq, taannalu innuttaasunut maaniittunut (Danmarkimi, aaqq.) pingaaruteqarluinnaartuuvoq, taamaammat pitsaanerusumik iliorsimasariaqaraluarpugut. 

Odensemi pisortaasoq, Kirsten Mærsk, tamatumunnga isumaqataavoq. Nunatsinnili qineqqusaartut suliassaqarfinni kalaallit Danmarkimi ilinniagaqartut angerlaqqinnissaannut pingaarutilinni aalajangiisartuusussat tikkuarpai.

- Politikerit Kalaallit Nunaanniittut maani Danmarkimi qinersisartutik samminiarnerusuuppatigit pitsaanerussagaluarpoq, pisortaq oqarpoq.

Aarhusimi Kalaallit Illuutaanni pisortaqatigiit tulliani kommunimut qinersisoqalerpat qanoq iliortoqarnissaa maanna isumaliutiginialereerpaat.

- Naak ukiut sisamat qaangiuppata aatsaat pisussaagaluartoq, tulliani qanoq pitsaanerusumik iliorsinnaanerluta eqqarsaatersuutigilereerpara, Jørn Holbech taama oqarpoq.