Nunanit allanit allakkatigut taasinerit ikitsuaraasut
allaaserisaq nutarterneqarpoq, apriilip tallimaani nal. 6.00
Nunatsinni kommunit sisamaasut ataasinngormat - ullormut qinersiviusumut aqaguttoq - allakkatigut taasinernik 31-nnarnik innuttaasunit Danmarkimiittunit nunanilu allaniittunit nassiussarsisimapput.
KNR-ip oqarasuaatikkut paasiniaanerani kommunit taama ilisimatitsipput.
Qinersisinnaatitaasut Nunatta avataaniittut amerlassusaat nikerartuupput, kalaallilli Danmarkimi ilinniagaqartut 18-ileereersimasut eqqarsaatigalugit 661-iupput.
AAMMA ATUARUK Kommunalpolitikki tamanik attuivoq
Taakku saniatigut allakkatigut taasisinnaatitaasut tassaapput kalaallit Danmarkimi ilinniagaqartut aapparisaat, inuillu Danmarkimiikkallartut, soorlu Rigshospitalimi katsorsartittut, sungisaatigalugu Danmarkimi sulisut, pineqaatissinneqarsimasunut inissiisarfimmi Herstedvester Fængselimiittut kiisalu politikerit atorfilittallu.
Kommuninut allakkatigut taasinerit agguataarsimanerat kommunerne
Sermersooq: 15
Qeqqata: 7
Kujalleq: 6
Avalak: Qinersinissaq oqallisigineqareerpoq
Ilinniartut peqatigiiffianni Avalammi siulittaasup Marie A. Kahligip allakkatigut taasinerit taama ikitsiginerat uggoraa.
- Taasinerit 100 procentiusuuppata soorunami pitsaanerpaassagaluarpoq. Kisianni taamaattoqanngilaq. Kommunimulli qinersinermi matumani tusarneqarnissaminnik pisariaqartitsisorisut taasisimanissaat oqartussaaqatigiinnermilu pisinnaatitaaffimminnik atuisimanissaat tatigisariaqarpara, KNR-imut taama oqarpoq.
Kalaallit Danmarkimi ilinniagaqartut taasisinnaatitaanerat, kommunini qinersisinnaatitaasut allattorsimaffii Danmarkimilu taasiartorfissat pillugit allagaqarnikkut, facebookikkut ataatsimiinnernilu Avalammit ilisimatitsissutigineqarsimapput.
Peqatigiiffilli kommunimut qinersineq pillugu oqallitsitsisimanngitsoq, Marie A. Kahligip nassuerutigaa. Taamaakkaluartoq qinersinissaq oqallisigineqarsimanerarpaa.
- Naapeqatigiittarnitsinni politikki, kommunit pilersaarutaat, qinigassanngortittut siunissarlu oqallisigisarpagut. Ukioq manna taamaaliorpugut.
Marie A. Kahlig allakkatigut taasisimavoq, ilinniartoqatimili taama ikitsigisut taamaaliorsimanerat sumik pissuteqarnersoq oqaatigisinnaannginnerarpaa. Ukiulli sisamat qaangiuppata kommunimut qinersisoqalerpat kalaallinut ilinniagaqartunut qanoq pilerinarsaasoqarsinnaaneranut periarfissanik takusaqarsinnaanerarpoq.
- Imaanngilaq ukioq manna kukkusimasugut. Politikkikkulli suliaqartunik oqalliseqateqarneq Kalaallillu Illuutaat atorluarneqarsinnaapput. Imaassinnavoq kalaallit ilinniagaqartut amerlanerusut, aammalu kalaallit Nunatta avataani najugaqartut allat takkuttut. Taamaaliornikkut oqallinnermik pitsaasumik pilersitsisoqarsinnaavoq, siulittaasoq oqarpoq.
