Kommunimut allakkatigut qinersinissamut periarfissaq kingulleq nallilersoq
Danmarkimi aningaasaqarnermut nunamilu namminermi pissutsinut ministereqarfik naapertorlugu, allakkatigut qinersinissaq piffissaligaanngilaq. Allakkatigulli qinersissut aatsaat atortuutinneqassaaq Nunatsinni qinersivimmut kingusinnerpaamik ullormi qinersiffiusumi apriilip sisamaani tiguneqarsimappat.
Allakkatigut taasissut allakkatut nalinginnaasutut nassiunneqassaaq. PostNordilu naapertorlugu, allakkat Danmarkimit Nunatsinnut nassiunneqartut ullut marluk arfinillillu akornanni ingerlaartarmata, allakkatigut taasineq atortuutinneqassappat sapaatit-akunnerata tulliani allakkatigut qinersisoqartariaqassaaq.
Nunatsinni innuttaasut Danmarkimi kommunit innuttaasunik sullissiviini Borgerserviceni qinersisinnaapput, innuttaasullu Danmarkimi napparsimmavinnut suliaritikkiartortut napparsimmavimmi uninngaffigisaminni allakkatigut qinersinissaminnut periarfissaqarlutik.
Aamma kalaallit pinerluuteqarsimasunut inissiisarfimmi Herstedvester Fængselimiittut qinersinissaannut atortussat Pinerluttunik Isumaginnittoqarfiup isumagissavai.
Kommunimut qinersinermut atatillugu allakkatigut qinersinissaq pillugu paasissutissat allat uani atuarneqarsinnaapput.
