Kajumissutsiminnik suleqataasussaaleqineq ikiuisussanut ajornartorsiutaasinnaasoq
Kalaallit Danmarkimi peqatigiiffii sammisaqartitsinerminnut kajumissutsiminnik suleqataasussanik pissarsinissaq ajornakusoortippaat, kalaallit Danmarkimi peqatigiiffiisa kattuffiata Inuit siulittaasuat, Bitha Metelmann, KNR-imut taama oqarpoq.
- Ilungersunartumik inissisimavugut, peqatigiiffinnummi ilaasortaarusuttut amerlavallaanngillat.
Taamaammat kalaallit ingerlalluartut kommunini sulisut peqatigalugit kalaallinik Danmarkimi inooqataanikkut ajornartorsiortunik ikiueqataasinnaanissaat takujuminaatsippaa.
Danskit partiivisa taamatut suliniuteqarnermut 2017-2020-mut Satspuljemit aningaasaliissutitigut 18,6 millionit koruunit immikkoortippaat.
- Taamatut ikiuisussanut kajumissutsiminnik suleqataasussanik pissarsinissaq ajornakusuussagunarpoq (..). Danmarkimi kalaallinik inooqataanikkut ajornartorsiortunik - ajornartorsiortunillumi allanik - ikiusussanik taama ittunik pilersitsisoqassappat immaqa pisariuallaassaaq, Bitha Metelmann taama oqarpoq.
Kulturikkut assigiimmik tunuliaqutaqarneq pisussaaffiliinngilaq
Kalaallit peqatigiiffiisa kattuffianni maleruaqqusat naapertorlugit, kattuffik Inuit kulturilerineq tunngavigalugu kattuffiuvoq. Taamaammat siulersuisuunerit peqatigiiffiit ataasiakkaat pisussaaffilersinnaanngilaat Danmarkimi kalaallit sanngiinnerit ikioqqullugit, kulturikkut assigiimmik tunuliaqutaqarneq pissutigiinnarlugu.
- Taamatut suliaqarusunnerluni inuup nammineq aalajangigassaraa. Ilungersornartupilussuuvoq, taamaammat inuup nammineq isumaliortaatsini malillugu aalajangigassaraa, Bitha Metelmann oqarpoq.
Erseqqissaatigalu Danmarkimi kalaalit inooqataanikkut ajornartorsiortut ikiorneqarnissaat kajumissutsiminnik suleqataasunit peqataaffigineqassappat, taakku suliatigut sukumiisumik piareersarneqaqqaartariaqassasut.
Tamatumali sulissutiginissaa paasititsiniutigineqarnissaaluunnii kalaallit peqatigiiffisa kattuffiata Inuit pilersaarutiginngilaa.
- Siulersuisuni tamanna ukiuni arlalinni eqqartortarparput, uagullu taamaaliornissamut piareersimasutut misiginngilagut, aamma nammineerluta kalaallinik inooqataanikkut ajornartorsiortunik ikiuinermik aallartitsinissaq piareersimaffiginngilarput. Suliassaqarfitta iluaniissorinngilara.
Forstanderi: Kajumissutsiminnik suleqataasut misilittagaqartut atorneqarlik
Kalaallit Danmarkimi ilinniagaqartut peqatigiiffianni Avalammi peqatigiiffiup suliarisartagaanut kajumissutsiminnik suleqataasussanik pissarsinissaq aamma ajornakusoortinneqarpoq, siulittaasoq Pam Stach taama ilisimatitsivoq. Tamanna pissutigalugu peqatigiiffiit ataasiakkaat ukiumi kingullermi matoqqajaasimapput.
Danmarkimili kalaallit inooqataanikkut ajornartorsiortut ikiorserneqarnissaannut kajumissutsiminnik suleqataasunik atuiniarneq tapersersornerlugu peqatigiiffiup isummerfigisimanngilaa.
Kofoeds Skolemili, Danmarkimi kalaallinik inooqataanikkut ajornartorsiungaartunik ikiuisarfiusumi forstanderip Robert Olsenip oqaatigaa, eqqortumik ikiuisoqassappat kajumissutsiminnik suleqataasunik misilittagalinnik atuinissaq pisariaqarluinnassasoq.
- Nutaanimmi misilittagaqanngitsunik atorfitsitsiinnartoqassappat, assigiinnassavaa aallaqqaataanit aallartilluni. Aaqqiissuussaanikkut arlaatigut misilittagaqanngitsunik kajumissutsiminnik suleqataasussanik kommunimut pissarsiuinnaraanni isumaqarpunga tamanna ajorluinnassasoq.
