Kalaallit Danmarkimi inooqataanikkut ajornartorsiortut immikkut sammineqalersut
Ataatsimeersuarneq Kalaallit Aalborgimi Illuutaannit Aalborgillu Kommunianit aaqqissuunneqarpoq, Kommuneqarfik Sermersuullu Qeqqata Kommuniatalu saniatigut aamma Danmarkimi kommuninit arlalinnit peqataaffigineqassaaq.
Ataatsimeersuarnerup siunertaraa Nunatsinni Danmarkimilu oqartussat susassaqartut suleqatigiilernissaat, taamaaliornikkut kalaallit Danmarkimiittut sapinngisamik pitsaanerpaamik ikiorneqarnissaat angujumallugu.
AAMMA ATUARUK Arbejdet med udsatte grønlændere i Danmark går fremad
Kalaallit 300-t 400-llu akornanniittut ukiut tamaasa Danmarkimut nuuttarput, ingerlalluaraluartullu nuunnermik kingorna inooqataanikkut ajornartorsiulersartut, Inuit Ataqatigiit sinnerlugit Folketingimut ilaasortaq Aaja Chemnitz Larsen, ataatsimeersuarnermik ullumikkut ammaasussaq, taama erseqqissaavoq.
- Danmarkimi inuuneq kalaalerpassuarnut pilerinarsinnaasarpoq, nuunnissarli piareersaateqarfigilluarsimanngikkaanni inuuneq naatsorsuutigisamit artornarnerusinnaavoq, Aaja Chemnitz Larsen oqarpoq.
AAMMA ATUARUK Aarhusip kalaallit inuuniarnermikkut ajornartorsiuteqartut nunasisutulli pisinnaatitaaffeqartinniarai
Tamannalu kalaallinut Danmarkimit Nunatsinnut uterusuttunut aamma atuuppoq.
- Tamakku aaqqiissuteqarfiginissaannut Nunatsinni Danmarkimilu kommunit suleqatigiinnerat nukittorsarneqartariaqarpoq, taamaammat ataatsimeersuarnerup Nunatsinni ingerlanneqarnera nuannaarutigisupilussuuara, Aaja Chemnitz Larsen ataatsimeersuarneq ullumi aallartittussaq, aqagulu naammassineqartussaq sioqqullugu taama oqarpoq.