Kielsenip Siumumi siulittaasuata tulliata Naalakkersuisut isornartorsiorai

Siumup siulittaasup tullia politikikkullu oqaaseqartartua, Karl Kristian Kruse, naalakkersuisut nammineq tunuliaqutsikkani sakkortuumik isornartorsiorpai.

Aalisarnermut politikkimi Naalakkersuisut aalajangigaat, taassuma isumaqatiginngilluinnarpaa.

Ullormi, Siumup siulittaasuata, Kim Kielsenip, Nunatta Qitornaanit Demokraatinillu aningaasanut inatsisissaq pillugu isumaqatigiissuteqarnermini nuannaarfiani, siumup siulittaasuata tullia Kim Kielsenip naalakkersuisuinik isornartoriuilluni tusagassiutinut allappoq.

Karl Kristian Krusep Naalakkersuisut aalisarnermut politikkiat qatsuppaa:

- Ataasianngitsumik Naalakkersuisut piumaffigereeraluarlugit nikeriassanatik aalajangiusimanninnerat peqataaffigiinnarsinnaanerlugu nalilersoqqissaarakku isertuutissanngilara, Karl Kristian Kruse tusagassiutinut allappoq.

Qaleralinniarnermut akuersissutit isumagineqarnerat isumaqatigiinngissutaasoq

Taanna arlalinnik isorisaqarpoq. Nunatta avannaani qaleralinniarnermut tunngatillugu aalajangiussaat ilaatigut taassuma isornartippai.

Krusep ilaatigut Naalakkersuisut avannaani aalisarsinnaanermut akuersissutinik tunniusseqqinniannginnerat naammagiunnaaqqaavaa.

AAMMA ATUARUK Nunatta avannaani umiatsiaararsortunut nutaanik akuersissuteqartoqarunnaartoq

Taamaammallu politikkikkut aqutsinerup peqataaffigiinnarnissaa taassuma apeqqusernartoqartilerpaa.

Karl Kristian Krusep taamatut isornartorsiuinera naalakkersuisut siulittaasuannit ernumaammersitsisinnaavoq, tassami Kruse Siumup siulittaasuata tulleraa partiillu politikkikkut oqaaseqartartoralugu.

Krusep Kielsen tapersersortaraluaraa

iumumi naalakkersuisut Siumullu inatsisartuni gruppianni politikkerit assigiinngitsunik isummertarnerat aatsaat pilinngilaq.

Aqutsiveqarfinni marluusuni qaleralittassat siorna naalakkersuisunit ikilisinneqaqqaarmata, Siumup inatsisartuni gruppiannit Karl Kristian Kruse siuttoralugu akerlerineqaqqaarput.

AAMMA ATUARUK Siumumi qaleralinniarneq pillugu suli isumminngitsut

Naak Karl Kristian Krusep naalakkersuisut aalisarneq pillugu politikkiat isornartorsioraluaraa, Siumumi aasaq manna aaqqiagiinngissuteqartoqarmat nammineq siulittaasuni Kim Kielsen tapersersorpaa.

Siumup inatsisartuni ilaasortaatitaasa akornanni arfinillit Kim Kielsenimut tatiginninnginnertik tassani takutippaat.

Siumup siulittaasuata Kim Kielsenip tamatumunnga oqaaseqartinnissaa KNR-ip sulissutigaa.