Imigassaq pillugu inatsit sukannerpallaarunnaassaaq
Inuusuttut 18-it inorlugit ukiullit unnukkut nalunaaqutaq arfineq-pingasut kingorna caféliarlutik aalakoornartortaqanngitsunik assigisaannilluunniit najoqqaasinnaanissaannut siunnersuut partiinit tamanit tapersersorneqarpoq.
Niuertarfiit imigassanik aalakoornartortalinnik ataasinngornermit arfininngornermut nalunaaqutaq ullaakkut quliniit unnukkut arfineq-pingasut tungaannut nioqquteqarsinnaalernissaat amerlanerussuteqartunit tapersersorneqarpoq. Kim Kielsen Laura Táunâjillu taaseqataanngillat.
AAMMA ATUARUK Forhastet at ændre alkohollov
Imigassat aalakoornartortallit pillugit pilerisaarutit suulluunniit inerteqqutaanerisa atorunnaarsinneqarnissaat amerlanerussuteqartut aamma tapersersorpaat.
Imigassaq nioqqutissanut allanut naleqqiullugu saagorsimajunnaartussanngorlugu siunnersuut oqallisaangaatsiarpoq, isumaqatigiinngittoqarporlu.
AAMMA ATUARUK Flertal vil ændre alkoholloven
Inuit Ataqatigiinneersut najuuttut arfineq-marluk, Partii Naleqqallu siulittaasua Hans Enoksen akerliupput, siunnersuulli 21-nit tapersersorneqarluni akuersissutigineqarpoq, arfineq-pingasut akeliusut.
Imigassaq pillugu inatsisinut allannguutissatut siunnersuutit sisamat akuersissutigineqartut naalakkersuisunut ingerlateqqinneqarput, Naalakkersuisullu Inatsisartut upernaaru ataatsimiinnissaannut siusinnerpaamik saqqummiussaqarsinnaassallutik.
AAMMA ATUARUK Alkohollov har ikke fået folk til at købe mindre
