KNTK AWG-ip taamaatinneqarneranut: Uggornaraluarpoq paasinarporli

Arctic Winter Games 2020-mik aaqqissuisut arfininngornermi unnukkut aalajangerput Arctic Winter Games taamaatiinnarneqassasoq. Arctic Winter Games ukiunik 50-nngortorsiorluni marsip uilluisa 15-ianni allartittussaagaluarpoq. 

Taamaatitsiinnartoqarneralu Kalaallit Nunaanni Timersoqatigiit Kattuffiani siulersuisuisuni siulittaasup uggoraa.

- Unammiartussat 74-it amerlanertaat kalerrereerpagut. Peqataasussat 128-ungaluarput, taakkualu tamaasa e-mailikkut oqarasuaatikkulluunniit paasitereerpagut. Taamaallaat sisamat toqqaannartumik kalerrinngilagut, taakkua oqarasuaatikkut immiussiffigaagut. Kisianni tassa taamaatitsisoqarnera uggornarpoq paasinarlunili, Nuka Kleemann oqarpoq.

AAMMA ATUARUK Arctic Winter Games aflyst på grund af frygt for corona

Arctic Winter Gamesip taamaatiinnarneqarnissaa pillugu Yukonimi peqqinnissamut oqartussaasut inassuteqartuupput. Unammiuaarnerit issittumiit 2.000-it missaannit peqataaffigineqartussaagaluarpoq.

- 2020-mi Arctic Winter Gamesip taamaatiinnarnissaa iliuuserineqarsinnaasuni akisussaassuseqartuliornerusoq aalajangiunneqarpoq, Arctic Winter Gamesimik aaqqissuisut nalunaarput.

Unammisaqattaarnerit aallartinnissaannut sapaatip akunneraannanngortoq taamaatitsisoqarnera paasinartoq siulittaasoq oqarpoq.

- Soorunami paasinarpoq sillimaniarneq pissutigalugu taamaatitsiinnartoqartoq. Nunarsuarmi coronavirusi siaruaakkiartornera aallaavigalugu taamatut aalajangernerat ataqqivarput. Taavalu aamma soorunami uggoralutigu sapaatip akunneraannanngortoq taamatut nalunaarfigineqaratta, Nuka Kleemann oqarpoq.

Arctic Winter Games 2020 Canadami Whitehorsemi nunap immikkoortuani Yukonimi marsip ulluisa 15-ianit 21-t ilanngullugu ingerlanneqartussaagaluarpoq.