- Aallartikkamali uku meeqqat inuusuttullu iluani sulilertussaallunga nalunngilara, aamma taassuma iluani meeqqat inuusuttullu soqutigisuugakkit taamaattumik naammassiguma taakkunani sulilertussaavunga, Isumaginninnermut siunnersortitut naammasserlaaq, Sara Olsvig Sandgreen oqarpoq.Assi: Privat

Isumaginninnermut siunnersortit atugaat kipiluttunaraluartut Sara O. Sandgreenip aporfiginngilai

Nunatsinni isumaginninnermut siunnersortit ilinniarsimasut amerlanerpaartaasa piginnaanertik kommunini isumaginninnermik sulianik tunngasunut atorusunneq ajorpaat. Sara Olsvig Sandgreenili kommunimi sullissinissaminut piareeqqavoq.

Nunatsinnimi isumaginninnermut siunnersortitut ilinniarsimasut 300-t missaanniipput taakkunanngali 77-iinnaat kommunini atorfeqarput.

Isumaginninnermut siunnersortitut naammasseqqammersoq kommunimilu atorfinittoq oqaloqatigaarput.

- Aallartikkamali uku meeqqat inuusuttullu iluani sulilertussaallunga nalunngilara, aamma taassuma iluani meeqqat inuusuttullu soqutigisuugakkit taamaattumik naammassiguma taakkunani sulilertussaavunga, Isumaginninnermut siunnersortitut naammasserlaaq, Sara Olsvig Sandgreen oqarpoq. Taanna Avannaata Kommuniani atorfinereerpoq.

AAMMA ATUARUK Inunnik isumaginninnermi suliallit akornanni pingajorarterutaannaat ilinniarsimasuupput

Avannaata Kommunia isumaginninnermut siunnersortinik ilinniarsimasunik amigaateqarnerpaanut ilaavoq. Tamaani atorfinni 51-iusuni taamaallaat sisamat isumaginninnermut siunnersortitut ilinniarsimasunik inuttaqarput.

Pissutsilli taamaakkaluartut, Sara Olsvig Sandgreenip aporfiginianngilai:

- Avannaata Kommuniani meeqqanut, inuusuttunut ilaqutariinnullu ingerlatsivimmi angalasartutut inunnik isumaginninnermut siunnersortitut atorfininnikuuvunga, taava illoqarfinni nunaqarfinnilu angalalluta sulisassaagut. Taamaattumik atorfik taanna suliffigilernissaa pissangagisorujussuuara.

Sara Olsvig Sandgreenitut isumaginninnermut siunnersortitut ilinniartoqartaraluarpoq, NIISIP-mmi paasissutissiinera naapertorlugu nunatsinnimi isumaginninnermut siunnersortitut ilinniarsimasut 300-t missaanniimmata, taakkunanngali 77-iinnaat kommunini atorfeqarput.

Isumaginninnermut siunnersortitut ilinniarsimasorpassuit sooq kommunini sulilertannginnerat paasiniarlugu misissuisoqarnissaa Inunnik Isumaginninnermik ilinniarsimasut Peqatigiiffianit kissaatigineqarpoq, kommunini atorfiit pingaarutillit inunnik isumaginninnermik ilinniarsimasunut pilerinarnerulernissaat siunissami angujumaneqarmat.

Kommunini suliassat kipiluttunarsinnaasut

Tamannalu Sara Olsvig Sandgreenimut ilisarnartortaqarpoq.

- Siullermik immaqa imaanneruvunga tusartakkallu malillugit ilaa soorlu nunatsinni ima pisoqarpoq, soorunalimi tamakku eqqartorneqartarneranni aporfiulaarnikuupput, soorlu immaannarluni; uanga ilumut taamatut sulerusuppunga? Kisianni aamma nammineq ilinniakkamik toqqaagaangatta nammineq toqqartarparput sunngorusunnerluta taamaattumik misilissavara, aamma ajorinngilara ilinniagaq nuannarigakku piumassuseqaramalu, taanna toqqarnikuuara, Sara Olvig Sandgreen KNR-imut oqarpoq.

AAMMA ATUARUK Isumaginninnermut siunnersortit sooruna Kommunini sulerusunngitsut?

Nunarput tamakkerlugu kommunini isumaginninnermut siunnersortit ilinniarsimasut katillugit 150-it missaanniittut amigaatigineqarput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl