Isumaginninnermut siunnersortit sooruna Kommunini sulerusunngitsut?
Nunatsinni kommunini isumaginninnermut siunnersortinik sulisunik amigaateqartoqangaatsiartoq, isumaginninnermut siornersortit ilinniarfimasut peqatigiiffiata, NIISIP, misissuineranit erserpoq.
Nunatsinni isumaginninnermut siunnersortitut ilinniarsimasut 154-it kommunini amigaatigineqarput. Nunarput tamakkerlugu isumaginninnermut siunnersortitut ilinniarsimasut 300-t missaanniipput.
AAMMA ATUARUK Inunnik isumaginninnermi suliallit akornanni pingajorarterutaannaat ilinniarsimasuupput
Siunnersortit sooq kommuninut suliffissarsiorneq ajornerat qulaajaaffigineqarnissaa, peqatigiiffiup Namminersorlutik Oqartussanut kaammattuutigaa.
Ilinniarsimasut innuttaasugut sukkanerusumik pitsaanerusumillu sullissisarput
Isumaginninnermut ikiortitut sulisut ilinniarsimasut pisariaqartinneqartut, NIISIP-p misissuinerat ersersippaa:
- Sukkanerusumik suliat ingerlalersinnaapput suliamik ilisimasaqarluaraanni suliamut aamma oqinnerusumik sullissineq pisinnaavoq, nunatsinni inunnik isumaginninnermi siunnersortit ilinniarsimasut peqatigiiffiani siulittaasup tullia Karen D. Jensen oqarpoq.
Taanna Isumaginninnermut, Suliffeqarnermut Nunamullu Namminermut Naalakkersuisumit, Mimi Karlsenimit (IA) taperserneqarpoq:
Innuttaasoq pisortanit ikiorneqassaguni ilinniarluarsimasumit sullinneqarsinnaasariaqarpoq. Inunnik isumaginninnermi ilinniarsimasoqarnikkut tamanna qulakkeerneqarsinnaavoq, Mimi Karlsen, tusagassiutinut nalunaarummi oqarpoq.
Kommunini isumaginninnermut siunnersortitut atorfillik pingajorarterutaat ilinniagaqarsimasartoq, NIISIP, misissuinerarni erserpoq.
Innuttaasut sullinnissaannut suunuku amigaatineqartut?
Kommunini sulisut isumaginninnermik siunnersortitut ilinniagallit amerlanerusut atorfinitsinneqarsinnaanissaat anguniarlugu, NIISIP, Naalakkersuisut iliuuseqaqquai.
- Aaqqiissutaasinnaasut NIISIP-minngaanniit eqqaasinnaasagut ukusinnaapput qulaajaanissaq, atorfiit naammappat? atorfiit tulluartumik pigineqarpat kommunini? Imaluunniit arlaatigut aaqqiisariaqarsorisaqarpa? Karen D. Jensen oqarpoq nangillunilu:
- Socialip iluani sullitat amerlasoorpassuupput, soorlu innarluutillit, utoqqarnik sullissisut, soraarnerussusiallit, meeqqanik sullissisut, område angisoorujussuugami. Naammattunik assannik peqarpugut, imaluunniit allatut eqqarsartariaqartugut?
AAMMA ATUARUK Isumaginninnermut siunnersortit qassiuneri ilisimaneqanngilaq
Meeqqanut, utoqqarnut, inunnut innarluutilinnut pingaartumillu ilaqutariinnut ajornartorsiortunut sullissisinnaasunik 154-inik kommunini amigaateqartoqarpoq.
Assersuutigalugu Avannaata Kommuniani isumaginninnermut siunnersortinik sulisussarsiorneq ajornakusoortinneqarpoq. Atorfiit 51-iusuni sisamat isumaginninnermut siunnersortitut ilinniarsimasunik inuttaqarput.
- Tassa maanna neriuutigivarput una misissuineq aallarnisaassutaalluni eqqartuinissaq qulaajaanissaq ingerlajumaartoq.
Meeqqanut, Inuusuttunut, Ilaqutariinnut Naalakkersuisup, Paneeraq Olsenip (Naleraq), suliaq aallartereersoq oqaatigaa:
- Upernaap massuma ingerlanerani suliap uuma ingerlarsornissaa naatsorsuutigilluinnarpara, Paneeraq Olsen oqarpoq.
