Inunnik isumaginninnermi suliallit akornanni pingajorarterutaannaat ilinniarsimasuupput
Inunnik isumaginninnermi kommunimi suliaq aalajangiiffigineqartussaq, assersuutigalugu meeqqannut ilaquttannulluunniit tunngasoq, aalajangiiffigineqassagaangami inunnik isumaginninnermi ilinniarsimanngitsumit aalajangiiffigineqaratarsinnaavoq.
Inunnik isumaginninnermi ilinniarsimasut peqatigiiffiata misissuinerata tamanna takutippaa. Paasissutissat kommuninit tallimaneersut peqatigiiffiup katersorsimavai, illoqarfiillu nunaqarfiillu amerlanersaat misissuinermi akissuteqarsimallutik.
Inunnik isumaginninnermi sulinermi ajornartorsiuteqartoqartoq, Isumaginninnermi, Suliffeqarfinermut Nunamullu Namminermut naalakkersuisup Mimi Karlsenip nassuerutigaa:
- Innuttaasoq pisortanit ikiorneqassaguni ilinniarluarsimasumit sullinneqarsinnaasariaqarpoq. Inunnik isumaginninnermi ilinniarsimasoqarnikkut tamanna qulakkeerneqarsinnaavoq, Mimi Karlsen, tusagassiutinut nalunaarummi oqarpoq.
Nalaakkersuisoq: Suliaq kajumminnarnerulersittariaqarparput
Inunnik isumaginninnermi ilinniarsimasunik atorfinitsiniarnerup ajornakusoorneranut peqqutaasut assigiinngitsuusut, inunnik isumaginninnermi ilinniarsimasut peqatigiiffiata oqaatigaa.
Akissarsiagissaarnerunissaq namminneq tikkuartorpaat, suliatigulli atuakkanik pitsanngorsaasoqartariaqarnera aamma eqqaallugu. Inunnik isumaginninnermi suliaqartup sulianik aalajangiiffigisassanik amerlavallaanik peqarsinnaavoq, suliatigut artukkerneqarsinnaalluni. Suleqatinilli aamma amigaateqarnermigut suliatigut aamma artukkerneqarnerusinnaavoq.
AAMMA ATUARUK Isumaginninnermut siunnersortit qassiuneri ilisimaneqanngilaq
Inunnilli isumaginninnermi ilinniarsimasut sulinerminni atugarissaarnerulissappata ataatsimoorussamik aaqqiiniartoqartariaqartoq, Meeqqanut, Inuusuttunut ilaqutariinnullu naalakkersuisoq Paneeraq Olsen(Naleraq) isumaqarpoq:
- Inunnik isumaginnittutuulli allatuulli akissarsiat aamma qimerloorneqarsinnaapput soorunami, kisianni aamma akissarsiaannaanngitsut, kisianni aamma suliffimmikkut atugaat eqqarsaatigalugit soorlu ineqarnikkut ikiorneqarnissaat, ineqartilluarneqarnissaat, sulinerminni atugarisaasa pitsanngorsarneqarnissaat assigiinngitsut aamma isiginiartariaqarpagut tamakkiisumik, Paneeraq Olsen oqarpoq.
Avannaata Kommunia assersuutigineqarsinnaavoq, tamaanimi inunnik isumaginninnermi sulialinnik pissarsiniarnissaq ajornakusoortinneqarpoq. Atorfiit 51-it akornanni sisamaannaat ilinniarsimasunik inuttalerneqarsimapput.
Upernaaru iliuuseqartoqarnissaa neriorsuutigaa
NIISIP-ip misissuinera naalakkersuisut NIISIP-illu januaarip ulluisa tallimaanni ataatsimeeqatigiinneranni qitiuvoq. Ajornartorsiutip qaangerniarneqarnissaanut iliuuseqartoqartariaqartoq isumaqatigiissutigineqarpoq.
AAMMA ATUARUK Stor interesse for socialrådgiveruddannelsen
Naalakkersuisullu suliaq aallartereeraat Paneeraq Olsenip KNR-imut oqaatigaa:
- Upernaap massuma ingerlanerani suliap uuma ingerlarsornissaa naatsorsuutigilluinnarpara, Paneeraq Olsen oqarpoq.
Inunnik isumaginninnermi sulisut 150-init amerlanerusut kommunini amigaatigineqartut eqqoriarneqarpoq. Naak inunnik isumaginninermi nunatsinni ilinniarsimasut 300-t sinneraluaraat taamaappoq.
