Marsip aallaqqaataa Isumaginninnermut siunnersortitut ilinniarfik soqutigineqaqisoq
Ilisimatusarfimmi ilinniartorpassuit tallimanngormat allagartartaarput. Taakkutut soraarummeernissat kissaatigigukku ilinniarnissamut ulloq qinnuteqarfissaq kingulleq qalliartorpoq.
Isumaginninnermut siunnersortitut ilinniarfik qinnuteqarfigineqartaqaaq. Isumaginninnermut tunngasut inuiaqatigiinni maanna eqqartugaanerunerat pissutaasoq, Ilisimatusarfimmi isumaginninnermut tunngasunut immikkoortortaqarfimmi pisortaq isumaqarpoq:
AAMMA ATUARUK Ilisimatusarfimmi allagartartaartitsilersut
AAMMA ATUARUK Piumasaqaatit qaffasissuutinnerisigut ilinniarnerup qaffasissuunissaa qulakkeerniarneqartoq
56-it siorna qinnuteqartut
- Ilinniarfik nutaarsiassatigut ukkatarineqarlunilu inunnit isummersorfigineqartaqaaq. Taamaammat inuusuttorpassuit inersimasullu peqataarusullutik isumaginninnermut siunnersortitut ilinniarusulersimasinnaapput, pisortaq Steven Arnfjord oqarpoq.
Isumaginninnermut siunnersortitut ilinniarfimmut qinnuteqartut siorna 56-iupput. Ilinniarfiilli ilaat taama amerlatigisunik qinnuteqarfigineqanngillat. Taakkua ilagaat tusagassiornermik ilinniarfik.
- Qinnuteqartut ukiumiit ukiumut allanngorartarput. Ilaanni amerlasoorujussuusarput, ilaanni ikittuinnaallutik, neriuutigaalu ukioq manna amerlanerusut qinnuteqassasut, tusagassiornermik ilisimatusarfimmi immikkoortortaqarfimmi pisortaq Naja Paulsen oqarpoq.
Piumasaqaatit naammassineqaqqaassasut
Tusagassiornermik ilinniarfimmut siorna qinnuteqartunit akuerisaasoqanngilaq. Ilinnialerniaraannimi piumasaqaatit aalajangersimasut naammassineqaqqaartariaqartut, pisortap erseqqissaatigaa.
- Qinnuteqartoqaraluarpoq kisianni aamma uagut qinnuteqartut misilitseqqaartarpagut , piumasaqaatigut allaninngaanniit sukanganerugamik. Soorlu oqaatsit pingasut atorsinnaasussaavaat, inuiaqatigiilerinermi ilisimasaqartuussapput taavalu aamma allatigut paasisimasaqartuusussaallutik, Naja Paulsen oqarpoq.
AAMMA ATUARUK Siunnersortitut ilinniarfiup nuunneqarniarnera piviusorsiunngitsoq
AAMMA ATUARUK Piareersimaffigisassat arlaqartut
Isumaginninnermut siunnersortitut ilinniarfimmut qinnuteqartunit 20-nnaat isersinnaapput. Taamaammat qinnuteqartuni ilinniakkatigut angusarissaarnerit toqqarneqassapput.
- 56-it qinnuteqarpata karakteerii taavalu aamma soorlu ilinniarnertuunngorniarfinni fagini sorlerni atuarsimanersut misissoqqaassavagut. Taava piukkunnarnerpaat toqqassavagut immikkullu piukkunnaateqarnersut paasiniarlutigu, Steven Arnfjord oqarpoq.
