Inatsisilerituutut ilinniarneq Piumasaqaatit qaffasissuutinnerisigut ilinniarnerup qaffasissuunissaa qulakkeerniarneqartoq
Inatsisilerituutulli suliniaraanni imaanngilaq karakterigissaarnissaq pisariaqartoq, suliffimmili misilittagaqarneq aamma naammappoq.
Inatsisinik bachelorinngorniarfimmi Ilisimatusarfimmi ilinniarsinnaanissaq pillugu suleqatigiissitami ilaasortaq, inatsisilerituutut ilinniarfimmi lektori Morten Nornild taama oqarpoq.
Inatsisilerituutut ilinniarnermut akuerisaanissamut piumasaqaatit qaffasippallaartut, inatsisilerituutut ilinniartitaaneq pillugu suleqatigiissitami ilaasortat isumaqarput.
AAMMA ATUARUK Oqaatsit inatsisilerinermi atorneqartartut kalaallisut taaguuteqanngitsut
Inatsilerituunngorniaraanni ilinniarnertuutut naammassisimanissaq piumasaqaataavoq, tassani agguaqatigiissillugu C, tassa 7, anguneqarsimassalluni, kalaallisullu qallunaatullu allattariarsornermi oqaluttariarsornermilu minnerpaamik B, tassa 10, anguneqarsimassalluni.
Pisinnaasalli allat aamma aallaavigalugit akueritittoqarsinnaassasoq Morten Nornildip oqaatigaa:
- Namminersorlutik Oqartussani kommuniniluunniit atorfeqarsimaguit, inatsisilerinermillu ukiorpaalunni misilittagaqarlutit, kalaallisullu oqalussinnaallutit, taava inatsisilerituutut Ilisimatusarfimmi ilinnialersinnaassaatit, Morten Nornild oqarpoq.
AAMMA ATUARUK Inatsisilerinermik ilinniarfik nunatsinnut iluaqutaassasoq
Ilinniarnertuunngorlaat, pisortanilu sulinermi misilittagallit inatsisilerituunngorniarfimmi ilinniarnermi oqallilluartalernissaat, inatsisilerituutut ilinniartitaaneq pillugu suleqatigiissitami ilaasortat neriuutigaat.
Inatsisinik Ilisimatusarfimmi bachelorinngorniarfimmi ilinniartitaanermut qinnuteqarniaraanni qinnuteqarnissamut ulloq killigititaq tassaavoq marsip aallaqqaataat.
AAMMA ATUARUK Ilisimatusarfimmi inatsisilerituutut ilinniartoqarsinnaalersoq