Issittumi sumiiffiit arlallit nunarsuarmi eriagisassanngortitassatut piukkunneqartut
Naalagaaffiit Peqatigiit ilinniartitaanermut, ilisimatusarnermut kulturimullu Suleqatigiiffiata UNESCO-p Issittumi sumiiffiit assigiinngitsut arfineq-marluk pillugit nalunaarusiaani taama ilaatigut inerniliisoqarpoq.
Sumiiffiit arfineq-marluk taakku akornanni sisamat nunatta sineriaaniipput.
Taakku tassaapput: Last Ice Area, Pikialasorsuaq, Qeqertarsuup Tunua Attullu Uummannaata Avataa, Tunumilu Kangertiitivallu kangerlua.
Sumiiffiit taakku Natural Marine World Heritage In the Arctic Oceanimik taallugu nalunaarusiami toqqarneqarput, nalunaarusiarlu UNESCO-mit ilaatigut suleqataaffigineqarluni.
AAMMA ATUARUK Inuit piniariartarfiata UNESCO-p allattorsimaffianut ilanngunneqarnissaa sulissutigineqartoq
Pinngortitaq pillugu nunarsuaq tamakkerlugu suliniaqatigiiffik Verdensnaturfonden isumaqarpoq nalunaarusiaq imartat illersorneqarnerulernissaannut atorneqarluarsinnaasoq, Kalaallit Nunaatalu tamanna aamma pingaaruteqartutut aamma isigisariaqaraa.
- Imartat pingaaruteqartut qanoq ilinikkut illersorneqarnerusinnaanerat pillugu oqallinnissamut nalunaarusiaq una periarfissiivoq, imartat aningaasarsiornermut atatillugu piujuaannartitsinissaq aallaavigalugu atorneqarsinnaanerat pillugu oqallinnermut atorneqarluarsinnaalluni, Mette Frost, Verdensnaturfondenimeersoq, tusagassiuutinut nalunaarummi ilaatigut oqarpoq.
AAMMA ATUARUK Kulturel verdensarvsprojekt i Qeqqata Kommunia
AAMMA ATUARUK Danmarkimi Ilulissat kangerluatut nunarsuarmioqatigiinnut eriagisassanngortitsisoqartoq
Kalaallit Nunaata imartaani pinngortitap illersorneqarnissaat pillugu iliuuseqarnerusoqarnissaa, Verdensnaturfondenip ujartorpaa, Issittup soqutigineqaleraluttuinnarnera ilaatigut tikkuartorlugu. Pinnngortitap illersorneqarnissaa pillugu iliuusissat piviusunngortinneqarnissaat, imartat atorneqarnissaat pillugu akuersissutinik tunniussinermut ajornannginnerusoq, Verdensnaturfondenip oqaatigaa.
AAMMA ATUARUK Sumiiffiit uku tallimat nunarsuarmioqatigiinnut eriagisassanngortinneqarsinnaapput
