ASSIT Sumiiffiit uku tallimat nunarsuarmioqatigiinnut eriagisassanngortinneqarsinnaapput
Ilulissat kangerlua Nunatsinni kisiartaalluni UNESCO-p nunarsuarmioqatigiinni eriagisassatut maanna allattorsimavoq. Nunattali kujataaniittut nunarsuarmioqatigiinni eriagisassatut allattorsimalissappata Ilulissat kangerluatulli takornarianit soqutigineqarluarnissaat neriuutaasoq, kultureqarnermut naalakkersuisoq Nivi Olsen tusagassiortunik katersuutsitsinermini nassuiaavoq.
Eriagisassanngortinneqarnisaanulli sumiiffiit illersornissaannut malittarisassaqartariaqarpoq, kultureqarnermullu naalakkersuisoqarfiup nalunaarusialiaata tamanna isumannaassavaa.
Sumiiffiit tallimat nunap assingani sumiinnersut nalunaarusiap ilaatigut imarivaa. Sumiiffinnilu qanoq angalatigisoqarsinnaanersoq nalunaarusiap aamma aalajangissavaa.
Tamanullu suli ammanissaat pilersaarutaagaluartoq, killeqassaaq. Assersuutigalugu eqqagassanik eqqaasoqaqqusaassanngilaq, tuperfigeqqusaassanani ikumatitaqaffigeqqusaassananilu.
Sumiiffiilli suli inuussutissarsiorfigineqarsinnaapput, soorlu savaateqarfiusinnaassallutik aamma naasorissaaffigineqarsinnaassallutik.
Nalunaarusiaq aappaagu januaarip aallaqqaataaniit atuutilernissaa ilimagineqarpoq.
