Qeqqata Kommunia kulturikkut kingornussassanngortitserusuppoq
Suliniut taaguuteqarpoq "Aasivissuit - Maliaq - Nipisat: Ukiut 4.500-t ingerlanerini issittumi najugaqarneq, piniarneq kulturillu naapittarnerat", ukiullu 4500-it ingerlanerini sumiiffiup inunnit atorneqarsimanera immikkut sammineqarluni, Qeqqata Kommuniani borgmesteri Hermann Berthelsen, kunngikkormiut sumiiffimmut unnugu alakkaterinissaat sioqqullugu tusagassiorfinnut nalunaaruteqarluni taama allappoq.
Kommunip Nunatsinnilu takornariaqarnikkut ineriartornermut suliniut pingaaruteqartuusoq borgmesterip oqaatigaa.
UNESCO-mut qinnuteqaat septembarimi aappaagu tunniunneqarnissaa siunertaavoq. Neriuutigineqarporlu 2018-imi Qeqqata Kommunia nunarsuarmioqatigiinnut kulturikkut kingornussassanngortitsisinnaassasoq.
- Neriuppunga 2018-ip aallartinnerani Qeqqata Kommuniani UNESCO nunarsuarmioqatigiinnut kulturikkut kingornussassanngortitsisimanerput nalliuttorsiutigisinnaassallutigu, Hermann Berthelsen taama oqarpoq.