Issittumi Suleqatigiinnermut Tapiissuteqartarfik kalaallit meerartaannut tapiissuteqartoq

Meeqqat pisinnaatitaaffiinik qulakkeerisussamik, naammagittaalliortarfimmik pilersitsisoqarnissaanut Qaqortumilu naqiterivimmik meeqqat eqqumiitsuliornermik piginnaasaannik siuarsaasusamik pilersitsinissamut aningaasaliisoqarpoq.

Allattoq Kim Hinrichsen

aggustip 09-at 2024 10:21

Nutserisoq Connie Fontain

Nunat Avannarliit Ministeriisa Siunnersuisoqatigiivisa Suleqatigiinnermut Tapiissuteqarfiat nunani avannarlerni suliniutinut 22-nut aningaasaliissuteqaqqammerluinnarpoq.

Taakkunannga pingasut nunatsinniipput.

Aamma atuarukInuusuttut nunanut avannarlernut suliartornissaminnut NAPA-mit taperneqarsinnaalerput

Suliniut Siu-Tsiu Qaqortumiittoq ilaatigut pineqarpoq. Tassani naqiterivik inuusuttut eqqumiitsuliornermik piginnaasaannut ikiuutaasussaq aallartinneqarpoq. Naqiterivimmi inuusuttut eqqumiitsuliornermi naqiterinermilu piginnaasanik assigiinngitsunik ilinniartinneqassapput.

Tamanna inuusuttut siunissami atorsinnaasaannik piginnaasaqalersitsissaaq, immaqalu imminnut upperinerulernissaannut suli pingaarnerulersitsisinnaallunilu nammineersinnaanerulersitsissaaq.

Siu-Tsiu Suleqatigiinnermut Tapiissuteqartarfimmit 350.000 koruuninik tapiissuteqarfigineqarpoq.

Naammagittaalliuteqartarfik meeqqat pisinnaatitaaffiinik qulakkeerissasoq

Tamatuma saniatigut Kalaallit Nunaanni meeqqat pisinnaatitaaffiinik sullissivik, MIO nunatsinni meeqqat naammagittaalliuteqarnissamut periarfissagissaarnerulernissaannik misissuinissamut 300.000 koruuninik aningaasaliiffigineqarpoq.

Meeqqat inuusuttullu pisinnaatitaaffiinik unioqqutitsinerit ukiorpassuarni kingullerni takunikuuagut. Suliniutip taakku malinneqarnerunissaat qulakkeerniarsarissavai.

MIO-p Nunavummit, Islandimit Danmarkimiillu misilittakkat siullertut misissuiffiginiarpai.

Aamma atuaruk MIO: Manumina amerlaqisunit ataasiinnaavoq

Pinngortitaleriffik suliniutit pingajuatut aningaasaliiffigineqarpoq, tassani suliniut "Enhancing narwhal conservation for sustainable Arctic development through innovative monitoring technologies" aningaasaliiffigineqarpoq.

NAPA aningaasanik agguaanissamut akisussaasuusoq ukioq manna 56-init qinnuteqaateqarfigineqarpoq, qinnuteqartullu 2022-mi 2023-milu qinnuteqartunit amerlanerupput, tamanna Issittumi piujuartitsinermik kulturimillu suliniutinik siuarsaanissamut soqutiginninnerulernermut pimoorussinerulernermullu takussutissaavoq.

Aningaasat nunani avannarlerni matumani Danmarkimi, Sverigemi, Finlandimi nunatsinnilu suliniutinut assigiinngitsunut agguaanneqartarput.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.