Inuusuttut nunanut avannarlernut suliartornissaminnut NAPA-mit taperneqarsinnaalerput
Sikkerninnguaq Olsenip Savalimmiunut suliartornissaminut kissaataa piviusunngorsinnaalerpoq.
Tassami Nunani Avannarlerni Piorsarsimassutsikkut Attaveqaammit NAPA-mit inuusuttunut nunanut avannarlernut suliartorniartunut aningaasatigut tapiisalerput.
- Nunatsinniit avammut angalaneq akisungaatsiarsinnaavoq, ingammik inuusuttunut. Taamaammat aalajangersimavugut, Kalaallit Nunaanneersut nunanut avannarlernut suliartorniartut immikkut tapiiffiginiarlugit, Napami attaveqaqatigiinnermut akisussaasoq, Malik Brøns taama oqarpoq.
Nordjobb
Inuusuttut 18-init-30-nut ukiullit nunani avannarlerni sulinerminni attaveqarnerulernissaannut suliniut Nordjobbimik taaguuteqarpoq.
Nordjobbilu aqqutigalugu suliartorniarlutik qinnuteqartussat sapinngisamik amerlanerpaatinniarlugit ilanngutassiamik tamat attaveqaqatigiittarfiitigut Tik Tokkikkut saqqummiipput.
Ingerlaannaq qinnuteqaasiorpoq
26-nik ukiulik Sikkerninnguaq Olsenip ilanngutassiaq taanna takuaa.
- Takugakku ingerlaannaq nuannerunartissuaalerpara, ingerlaannarlu qinnuteqaasiorlunga aallartillunga, Sikkerninnguaq Olsen taama oqarpoq.
Taannalu qinnuteqartuni kisimiinngilaq, inuusuttut nunanut avannarlernut suliartorniarlutik jannuaarip ingerlaneriinnaani qinnuteqarsimasut marloriaatinngorsimasut, Malik Brøns paasissutissiivoq.
- Ukioq mannna jannuaariinnarmi qinnuteqarsimasut 20-viusimapput. Tamanna tupaallaatigalugu nuannaarutigaarput, Malik Brøns taama oqarpoq.
Sikkerninnguaq Olsen tapiiffigineqartussanut ilaavoq.
Taassuma maajimi suliartornissaminut 3000 koruuninik NAPA-mit taperneqartussanngorami Savalimmiunut suliartornissami piviusunngorsinnaalernera nuannaarutigaa:
- Tusagaq nuannerpoq, Kalaallit Nunaaninngaanniit angalaniarneq akisunermik. Soorlu uanga Savalimmiunut aallarnissanut annertulaartumik katerseqqaartariaqarpunga, taakkulu 3000-it iluaquterujuussapput. Kisianni aamma neriuppunga allaninngaanniit tapiiffigineqarnissamut soqutiginnittoqarumaartoq. Sikkerninnguaq Olsen taama oqarpoq.
Inuusuttut Nordjobb aqqutigalu nunanut avannarlernut suliartorusuttut Sverigemut, Danmarkimut, Norgemut, Finlandimut, Islandimut, Savalimmiunut Ålandimullu suliartornissaminnut taperneqarnissaminnut qinnuteqarsinnaapput.
